WAGYZ-NESIHAT ÇÄRESI GEÇIRILDI
2026-njy ýylyň 8-nji sentýabrynda Türkmenistanyň Daşary işler ministrliginiň Halkara gatnaşyklary institutynda hormatly Prezidentimiziň parasatly baştutanlygynda ýurdumyzda ýaşlar baradaky döwlet syýasatyny üstünlikli durmuşa geçirmek, talyp ýaşlaryň hukuk sowatlylygyny ýokarlandyrmak, olaryň jemgyýetçilik tertibini, ýol hereketiniň we ýangyn howpsuzlygynyň kadalaryny berjaý etmeklerini gazanmak, sagdyn durmuş ýörelgelerini wagyz etmek, hukuk bozulmalarynyň hem-de jenaýatçylygyň öňüni almak, şeýle-de milli ahlak ýörelgelerine ygrarly, watansöýüji we giň dünýägaraýyşly ýaşlary terbiýelemek maksady bilen wagyz-nesihat duşuşygy geçirildi.
Duşuşykda Türkmenistanyň Mejlisiniň deputaty Kerimguly Berdiýew, Türkmenistanyň Baş prokuraturasynyň Hukuk üpjünçiligi bölüminiň müdiriniň wezipesini wagtlaýyn ýerine ýetiriji, 3-nji derejeli ýurist Hezretali Annaberdiýew, Aşgabat şäheriniň Köpetdag etrap kazyýetiniň kazynyň kömekçisi Dünýä Gurbangeldiýewa, Türkmenistanyň Demokratik partiýasynyň Köpçülikleýin habar beriş bölüminiň müdiri Bibiaýşa Saparowa, Türkmenistanyň Ylym we bilim işgärleriniň kärdeşler arkalaşygynyň Geňeşiniň başlygy Hanaly Baýramow, Türkmenistanyň Saglygy goraýyş işgärleriniň kärdeşler arkalaşygynyň Geňeşiniň başlygy Parahat Kakajaýew hem-de Türkmenistanyň Magtymguly adyndaky Ýaşlar guramasynyň Aşgabat şäher geňeşiniň bölüm müdiri Hoşgeldi Annageldiýew çykyş etdiler.
Şeýle hem Türkmenistanyň Içeri işler ministrliginiň Polisiýanyň ýol gözegçiligi müdirliginiň 4-nji bölüminiň aýratyn tabşyryklar boýunça uly gözegçisi, polisiýanyň podpolkownigi Juma Pygyýew, 4-nji müdirliginiň bölüm müdiri, polisiýanyň maýory Batyr Berkeliýew, Jenaýat agtaryş müdirliginiň bölüm müdiri, polisiýanyň maýory Serdar Akmämmedow, Derňew müdirliginiň işgäri Azat Saparjaýew, Jemgyýetçilik howpsuzlygy müdirliginiň 2-nji bölüminiň müdiri Mekan Baýjanow, Metbugat merkeziniň bölüm müdiri, polisiýanyň podpolkownigi Toýly Abdullaýew hem-de Ýangyn howpsuzlygy müdirliginiň 7-nji bölüminiň müdiri, içerki gullugyň maýory Toýly Baýramow çykyş etdiler.
Çykyş edenler ýaşlaryň hukuklary we borçlary, kanunyň hökmürowanlygy, jemgyýetçilik tertibini goramak, ýol hereketiniň düzgünlerini berjaý etmek, jenaýatlaryň we hukuk bozulmalarynyň öňüni almak, internet ulgamyndan hem-de köpçülikleýin habar beriş serişdelerinden jogapkärli peýdalanmak, ýangyn howpsuzlygy, sagdyn durmuş ýörelgeleri, milli terbiýe, zähmet we jemgyýetçilik işjeňligi ýaly möhüm ugurlar boýunça giňişleýin gürrüň berdiler. Her bir ugur boýunça durmuşdan alnan mysallar getirilip, talyp ýaşlara peýdaly maslahatlar berildi.
Wagyz-nesihat çäresiniň dowamynda ýurdumyzda ýaş nesilleriň kämil bilimli, sagdyn bedenli, giň dünýägaraýyşly, päk ahlakly we kanuna hormat goýýan şahsyýetler bolup ýetişmegi bilen baglanyşykly meselelere aýratyn üns berildi. Duşuşygyň dowamynda talyplaryň sowallaryna degişli hünärmenler tarapyndan giňişleýin jogap berildi.
Duşuşygyň ahyrynda oňa gatnaşyjylar halkymyzyň bagtyýar, abadan durmuşda ýaşamagy, ýaş nesliň döwrebap bilimli we hemmetaraplaýyn kämil ynsanlar bolup ýetişmegi ugrunda giň mümkinçilikleri döredýän Gahryman Arkadagymyza hem-de Arkadagly Gahryman Serdarymyza hoşallyk sözlerini beýan etdiler.
Jennet EMINOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 1-nji ýyl talyby