Ulag diplomatiýasy — türkmen-owgan gatnaşyklarynyň möhüm ugry
2022-nji ýylyň 21-nji dekabrynda Türkmenistanyň Daşary işler ministrliginiň Halkara gatnaşyklary institutynda hereket edýän Türkmenistanyň diplomatiýasynyň möhüm ugurlary boýunça okuw Merkeziniň çäklerinde (TDMUOM) Türkmenistanyň Owganystan Yslam Respublikasyndaky Adatdan daşary we Doly ygtyýarly Ilçisi Hoja Öwezow bilen institutyň talyplarynyň gatnaşmagynda «Ulag diplomatiýasy» boýunça duşuşyk geçirildi.
Diplomat duşuşygyň dowamynda türkmen-owgan gatnaşyklarynyň çäklerinde gazanylan tejribe, hyzmatdaşlygyň häzirki ýagdaýy we geljekde ikitaraplaýyn gatnaşyklary ösdürmekde öňde durýan wezipeler barada gürrüň berdi. Şeýle-de Ilçi Türkmenistanyň we Owganystanyň arasyndaky syýasy, söwda-ykdysady, ulag-aragatnaşyk, ylym-bilim, medeni-ynsanperwer ugurlardaky gatnaşyklary bar bolan mümkinçilikleriň esasynda mundan beýläk-de ýokarlandyrmakda alnyp barylýan işler barada durup geçdi. Türkmenistanyň Owganystandaky diplomatik missiýasynyň ýolbaşçysy ýurdumyzyň owgan halkynyň asuda we abadan durmuşda ýaşamagyny gazanmakda berýän goldawynyň goňşy döwletiň ýerli ilaty tarapyndan çuňňur minnetdarlyk bilen kabul edilýändigini aýratyn belledi. Ilçi Hoja Öwezow Türkmenistanyň Owganystandaky ykdysady ýagdaýy durnuklylaşdyrmak maksady bilen bilelikdäki halkara taslamalara uly üns berýändigini belläp, olaryň hatarynda Türkmenistan — Owganystan — Pakistan — Hindistan gaz geçirijisiniň gurluşygyny, şeýle-de Türkmenistan — Owganystan — Pakistan ugry boýunça ýokary woltly elektrik geçiriji we optiki-süýümli aragatnaşyk ulgamlarynyň taslamasyny mysal getirdi. Mundan başga-da, ulag-aragatnaşyk ulgamynda iki ýurduň arasynda giň mümkinçilikleriň bardygy bellenilip, bu ugurda Kerki — Ymamnazar — Akina, Serhetabat — Turgundy, Akina — Andhoý demir ýollarynyň, «Lapis Lazuli» adyny alan Owganystan — Türkmenistan — Azerbaýjan — Gruziýa — Türkiýe ulag-üstaşyr geçelgesiniň ähmiýeti dogrusynda giňişleýin gürrüň berildi.
Täsirli geçen duşuşygyň ahyrynda talyplar özlerini gyzyklandyrýan sowallar bilen Ilçä ýüzlenip, olara takyk we giňişleýin jogap aldylar.
Mätgurban MÄTGURBANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.