Ulag diplomatiýasy boýunça okuw sapaklary
Ulag diplomatiýasy Türkmenistanyň 2017-2023-nji ýyllar üçin daşary syýasat Konsepsiýasynyň esasy ugurlarynyň biri bolup çykyş edýär. Hormatly Prezidentimiziň başlangyjy esasynda Türkmenistanyň Daşary işler ministrliginiň Halkara gatnaşyklary institutynda hereket edýän Türkmenistanyň diplomatiýasynyň möhüm ugurlary boýunça okuw merkezinde “Ulag diplomatiýasy” ugry boýunça ýörite tassyklanan okuw meýilnamasyna laýyklykda fakultatiw okuwlar ýokary derejede geçirilýär. Türkmenistanyň Prezidentiniň daşary syýasatynda ulag diplomatiýasy boýunça halkara hyzmatdaşlygyny alyp barmaga gönükdirilen başlangyçlaryny hem-de olaryň iş ýüzünde durmuşa geçirilişini çuňňur öwrenmek esasynda hünär öwreniş we hünär kämilleşdiriş maksatly okuwlary guramak merkeziň esasy wezipesi bolup durýar. Şu nukdaýnazardan, Türkmenistanyň diplomatiýasynyň möhüm ugurlary boýunça okuw merkeziniň çäklerinde amala aşyrylýan ylmy-barlag işleri we geçirilýän ýöriteleşdirilen okuwlary bu möhüm wezipeleri çözmeklige gönükdirilýär. Bu işleriň netijesinde ýörite tassyklanan meýilnamalar esasynda okuw sapaklary guralýar, ylmy-seljeriş häsiýetli makalalar çap edilýär hem-de Halkara gatnaşyklary institutynyň okuw studiýasynda merkeziň işi bilen baglanyşykly gepleşikler taýýarlanylýar. Tassyklanan meýilnamalara laýyklykda ýerli we daşary ýurtly bilermenleriň gatnaşmagynda fakultatiw okuw sapaklary wideoaragatnaşyk arkaly hem üstünlikli geçirilýär hem-de olaryň netijeleri boýunça merkeziň diňleýjileri tarapyndan nutuklar, prezentasiýalar taýýarlanylýar.
2021-nji ýylyň 1-nji martynda “Ulag diplomatiýasy” ugry boýunça “Türkmenistanyň Halkara ulag–üstaşyr geçelgeleriniň gurluşygynda halkara maliýe guramalary (Aziýa ösüş banky, Yslam ösüş banky, Ýewropanyň Abatlaýyş we ösüş banky we beýleki maliýe guramalar) bilen geljekki hyzmatdaşlygyň mümkinçilikleri barada” atly fakultatiw okuw sapagyny Türkmen döwlet maliýe institutynyň Bank işi kafedrasynyň uly mugallymy Ýaňyl Mämmedowa we şol kafedranyň öwreniji mugallymy Orazmuhammet Kakabaýew dagylar alyp bardylar. Okuw sapagy wideoaragatnaşyk görnüşinde geçirildi. Bu okuw sapaklaryna Türkmenistanyň Daşary işler ministrliginiň Halkara gatnaşyklary institutynyň, Türkmen döwlet maliýe institutynyň talyplary işjeň gatnaşdylar. Okuw sapagy talyplar üçin örän täsirli boldy.
Döwlet JUMAGYLYJOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň I ýyl talyby