UÇURYMLARYŇ BAÝRAMÇYLYK DABARASY GEÇIRILDI
2026-njy ýylyň 13-nji iýunynda Türkmenistanyň Daşary işler ministrliginiň Halkara gatnaşyklary institutynda uçurymlaryň baýramçylyk dabarasy geçirildi. Oňa türkmen diplomatiýasynyň milli mekdebiniň professor-mugallymlarydyr talyplary, şeýle hem uçurym talyplaryň ata-eneleri gatnaşdylar.
Baýramçylyk dabarasynda institutyň professor-mugallymlary, halypa diplomatlar gutlag sözleri bilen çykyş edip, uçurymlara ak ýol, uly üstünlikleri arzuw etdiler. Dabaranyň dowamynda uçurym talyplaryň ata-eneleri hoşallyk sözleri bilen çykyş etmekleri gatnaşyjylarda ýakymly täsirleri galdyrdy.
Ýeri gelende bellesek, şu okuw ýylynda uçurymlaryň 18-si ýokary okuw mekdebini tapawutlanan diplom bilen tamamlamagy başardylar. Dabaranyň dowamynda instituty tapawutlanan diplom bilen tamamlan, şeýle-de jemgyýetçilik-syýasy we medeni-köpçülikleýin çärelere işjeň gatnaşyp, görelde görkezen uçurymlar Hormat hatlary bilen sylaglanyldy.
Uly ruhubelentlige beslenip geçen dabarada uçurymlaryň talyplyk ýyllaryna degişli wideoşekilleriň görkezilmegi özboluşly tolgunmalary döretdi.
Mälim bolşy ýaly, häzirki wagtda hormatly Prezidentimiziň parasatly baştutanlygynda ylym-bilim ulgamynda ägirt uly özgertmeler amala aşyrylýar. Şunuň bilen baglylykda, «Türkmenistanda ýokary hünär bilimini ösdürmegiň 2026 — 2052-nji ýyllar üçin Strategiýasynyň» kabul edilmegi aýratyn bellärliklidir. Türkmenistanyň Daşary işler ministrliginiň Halkara gatnaşyklary institutynyň öňünde duran esasy wezipeleriň biri hem ýurdumyzyň parahatçylyk söýüjilikli daşary syýasatyny üstünlikli durmuşa geçirjek, döwletimiziň dürli ulgamlarynda zähmet çekip, eziz Diýarymyzyň ösüşlerine mynasyp goşant goşjak ýokary derejeli hünärmenleri taýýarlamakdan ybaratdyr. Bu babatda institutda geçirilen uçurymlaryň baýramçylyk dabarasy möhüm ähmiýetli waka boldy.
Baýramçylyk dabarasy joşgunly aýdym-sazly çykyşlar bilen utgaşdy. Onuň dowamynda ýurdumyzyň sungat ussatlary, şeýle-de institutyň aýdym-saz we döredijilik toparynyň talyplary ata Watanymyzy, Gahryman Arkadagymyzy, Arkadagly Gahryman Serdarymyzy wasp edýän aýdymlary ýerine ýetirdiler. Baýramçylyk dabarasynyň barşynda umumadamzat bähbitli başlangyçlary öňe sürüp, ýurdumyzyň halkara abraýyny barha belende galdyrýan, kämil ylym-bilimli, giň dünýägaraýyşly, ýokary derejeli halkaraçy hünärmenleri taýýarlamakda ähli mümkinçilikleri döredip berýän Milli Liderimize hem-de hormatly Prezidentimize alkyş sözleri aýdyldy.
Rasul ATAJANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 3-nji ýyl talyby