«Türkmenistanyň ulag diplomatiýasyny ösdürmek babatynda halkara hyzmatdaşlygy» ATLY MASLAHAT
2024-nji ýylyň 22-nji aprelinde Türkmenistanyň Daşary işler ministrligi tarapyndan Halkara gatnaşyklary institutynda «Türkmenistanyň ulag diplomatiýasyny ösdürmek babatynda halkara hyzmatdaşlygy» atly maslahat geçirildi. Bu maslahata Türkmenistanyň Daşary işler ministrliginiň, Türkmenistanyň Mejlisiniň, Türkmenistanyň Ministrler Kabinetiniň ýanyndaky Ulag we kommunikasiýalar agentliginiň, Türkmenistanyň Inžener-tehniki we ulag kommunikasiýalary institutynyň wekilleri, ýurdumyzyň gazet-žurnallarynyň baş redaktorlary, syýasatşynaslar, Türkmen diplomatiýasynyň milli mekdebiniň professor - mugallymlary we talyp ýaşlary gatnaşdylar.
Maslahatda Türkmenistanyň Daşary işler ministriniň orunbasary Ahmet Gurbanowyň, Türkmenistanyň Daşary işler ministrliginiň Halkara gatnaşyklary institutyň rektory Jumamyrat Gurbangeldiýewiň, Türkmenistanyň Mejlisiniň Halkara we parlamentara aragatnaşyklar baradaky komitetiniň başlygy Kerimguly Geldiýewiň, Türkmenistanyň Inžener-tehniki we ulag kommunikasiýalary institutynyň ylmy işler boýunça prorektory Gulmet Penaýewiň, Türkmenistanyň Ministrler Kabinetiniň ýanyndaky Ulag we kommunikasiýalar agentliginiň “Türkmenhowaýollary” agentliginiň Uçuşlaryň howpsuzlygynyň standartlary müdirliginiň ekolog-inspektory Laçyn Dädekowanyň, Türkmenistanyň Ministrler Kabinetiniň ýanyndaky Ulag we kommunikasiýalar agentliginiň “Türkmendemirýollary” agentliginiň Magtymguly adyndaky ilkinji Ýaşlar guramasynyň başlygy Myrat Goşaýewiň, Türkmenistanyň Daşary işler ministrliginiň Halkara gatnaşyklary institutyň Halkara ykdysady gatnaşyklary kafedrasynyň uly mugallymy Perhat Çaryýewiň çykyşlary we BMG-niň ýanyndaky Ulag diplomatiýasynyň Halkara merkeziniň ýerine ýetiriji sekretary Igor Runowyň wideoýüzlenmesi diňlenildi.
Maslahatda çykyş edenler ýurdumyzyň alyp barýan ulag syýasaty we onuň halkara hyzmatdaşlygy, 2024-nji ýylyň 15-19-njy aprelinde Aşgabatda geçirilen Demir ýollaryň hyzmatdaşlygy guramasynyň (OSJD) agza döwletleriniň demir ýol ulaglary edaralarynyň ýolbaşçylarynyň we jogapkär wekilleriniň maslahatynyň XXXVIII mejlisiniň netijeleri boýunça kabul edilen Aşgabat Jarnamasynyň taryhy ähmiýeti barada belläp geçdiler.
Şeýle-de maslahat çäklerinde geçirilen «Durnukly ulag ulgamy: söwda-ykdysady gatnaşyklaryň daýanjydyr» atly tegelek-stolda degişli ugurlar boýunça sorag-jogap alyşmak görnüşinde dowam edip, oňa gatnaşyjylar Türkmenistanyň başlangyjy boýunça BMG-niň Baş Assambleýasy tarapyndan dürli ýyllarda kabul edilen köptaraplaýyn ulag hyzmatdaşlygyny ösdürmäge gönükdirilen degişli kararnamalaryň ähmiýeti barada nygtadylar. Ýeri gelende bellesek, şol başlangyçlar esasynda 2023-nji ýylda BMG-niň Baş Assambleýasy tarapyndan “Bütindünýä durnukly ulag güni” diýip yglan etmek hakynda Kararnamanyň kabul edilmegi hem Türkmenistanyň Prezidentiniň ulag diplomatiýasyny ösdürmegiň 2022 — 2025-nji ýyllar üçin Maksatnamasynda öňde goýulan wezipeleriň üstünlikli amala aşyrylýandygynyň aýdyň subutnamasy hökmünde bellemek gerekdir.
Maslahatyň ahyrynda oňa gatnaşyjylar Türkmenistanyň ulag diplomatiýasyny ösdürmek babatynda halkara hyzmatdaşlygy dünýäde dabaralandyrýan Gahryman Arkadagymyzyň hem-de Arkadagly Gahryman Serdarymyzyň janlarynyň sag, ömürleriniň uzak bolmagyny arzuw etdiler.
Nazar MEREDOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
kafedrasynyň mugallymy.
Bu barada şu ýerde hem okap bilersiňiz: