TÜRKMENISTANYŇ DÖWLET, HUKUK WE DEMOKRATIÝA INSTITUTYNYŇ YLMY IŞGÄRLERI BILEN DUŞUŞYK GEÇIRILDI
2024-nji ýylyň 6-njy martynda Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň «Ýaş hukukçylar» ylmy gurnagynyň hem-de institutyň «Ýaş alymlar geňeşiniň» agzalarynyň gatnaşmagynda Türkmenistanyň Döwlet, hukuk we demokratiýa institutynyň ylmy işgärleri bilen duşuşyk geçirildi.
Bu duşuşyk Gahryman Arkadagymyzyň 2024-nji ýylyň 22-nji fewralynda Türkmenistanyň Halk Maslahatynyň Prezidiumyndaky çykyşyndan gelip çykýan wezipelerden ugur alnyp, «Türkmenistany durmuş-ykdysady taýdan ösdürmegiň maýa goýum Maksatnamasyny» amala aşyrmagyň çäklerinde geçirildi.
Duşuşygyň dowamynda ýurdumyzda amala aşyrylýan durmuş-ykdysady maksatnamalaryň ähmiýeti, olaryň hukuk esaslary we bu babatda ýaşlaryň işjeňligini artdyrmakda wagyz-nesihat çäreleriniň, ylmy-amaly maslahatlaryň wajyplygy we şol ugurda alnyp barylýan işler dogrusynda ýaşlaryň arasynda dürli duşuşyklary geçirmekligiň ähmiýeti barada giňden bellenilip geçildi.
Şeýle-de institutymyzyň talyp ýaşlaryny Türkmenistanyň Döwlet, hukuk we demokratiýa institutynyň çäginde täze açylan Türkmen-german deňeşdirme hukuk öwreniş maglumat merkezi bilen tanyşdyryldy we oňa bagyşlanan sergiler gurnaldy. Onda institutyň işgärleri tarapyndan özleriniň alyp barýan ylmy-barlag işleri barada ylmy işgärler bilen tejribe alşyp, özleriniň ylma bolan garaýyşlaryny öňe sürüp, ýaşlary ylmy-barlag işlerine gatnaşmaga çagyrdylar. Şeýle duşuşyklaryň geçirilmegi ilkinji nobatda ýaşlarda hukuk sowatlylygyny we hukuk aňyýetini ösdürmekde uly ähmiýete eýedir.
Azanali AZIZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy
fakultetiniň I ýyl talyby.