Türkmenistanyň diplomatik işgärleriniň gününe bagyşlanan ylmy maslahat
2022-nji ýylyň 18-nji fewralynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatik işgärleriniň güni mynasybetli «Dialog – parahatçylygyň kepili» atly ylmy maslahat geçirildi. Maslahata Türkmenistanyň diplomatik düzüminiň, ýurdumyzda hereket edýän diplomatik wekilhanalaryň wekilleri, ýokary okuw mekdepleriň professor mugallymlary, köpçülikleýin habar beriş serişdeleriniň wekilleri hem-de talyp ýaşlar gatnaşdylar.
Maslahatyň çäklerinde Halkara gatnaşyklary institutynyň binasynda Türkmenistanyň Daşary işler ministrliginiň, abraýly halkara guramalaryň, daşary ýurtlaryň diplomatik wekilhanalarynyň, ýurdumyzyň ýokary okuw mekdepleriniň bilelikde guran sergisi ýaýbaňlandyryldy.
Maslahata gatnaşyjylar hormatly Prezidentimiziň Türkmenistanyň diplomatik gullugynyň işgärlerine iberen Gutlagyny üns bilen diňlediler. Maslahatyň dowamynda Türkmenistanyň Döwlet, hukuk we demokratiýa institutynyň direktory Ýagmyr Nuryýew, Amerikanyň Birleşen Ştatlarynyň Türkmenistandaky Adatdan daşary we Doly ygtyýarly Ilçisi Metýu Stefen Klimow, Halkara ynsanperwer ylymlary we ösüş uniwersitetiniň rektory Esen Aýdogdyýew, Hytaý Halk Respublikasynyň Türkmenistandaky Adatdan daşary we Doly ygtyýarly Ilçisi Sýan Naýçen, Birleşen Milletler Guramasynyň Ösüş Maksatnamasynyň Türkmenistandaky Hemişelik wekili hanym Narine Saakýan, Eýran Yslam Respublikasynyň Türkmenistandaky Adatdan daşary we Doly ygtyýarly Ilçisi Golam Abbas Arbab Hales çykyş etdiler. Çykyşlarda bellenilişi ýaly, Türkmenistan özüniň oňyn Bitaraplyk ýörelgelerine esaslanýan daşary syýasatyny üstünlikli durmuşa geçirýär. Şeýle-de hormatly Prezidentimiziň «Dialog – parahatçylygyň kepili» atly täze filosofiýasy bilen Türkmenistan sebitde we dünýäde parahatçylygy we howpsuzlygy üpjün etmekde öňe sürýän başlangyçlarynyň dünýä bileleşiginiň giň seslenmesine we ykrarnamasyna eýe bolýandygy nygtaldy.
Dabaraly çäräniň dowamynda Türkmenistanyň diplomatik gullugynyň ýaş işgärlerine we Türkmenistanyň Daşary işler ministrliginiň Halkara gatnaşyklary institutynyň uçurym talyplaryna eziz Diýarymyzyň daşary syýasy strategiýasyny durmuşa geçirmäge işjeň goşant goşýandyklary üçin degişli diplomlar gowşuryldy.
Ylmy maslahata gatnaşyjylar hormatly Prezidentimize Ýüzlenme kabul edip, milli Liderimize ýurdumyzyň diplomatik gullugynyň düzümini aýratyn üns merkezinde saklaýandygy we ony mundan beýläk-de kämilleşdirmekde edýän taýsyz tagallalary üçin tüýs ýürekden hoşallyk bildirdiler hem-de döwletimiziň daşary syýasat ugruny üstünlikli durmuşa geçirmekde alyp barýan işleriniň rowaçlyklara beslenmegini arzuw etdiler. Maslahatyň ahyry Türkmenistanyň diplomatik işgärleriniň güni mynasybetli baýramçylyk konserti bilen dabaralandy.
Täçnabat PAÝTYKOWA,
Türkmenistanyň Daşary işler ministrliginiň
Halkara gatnaşyklary institutynyň uly mugallymy.
Şeýle hem bu barada şu ýerde okap bilersiňiz:
https://ashgabat.in/2022/02/18/turkmenistanyn-diplomatik-isgarlerinin-guni-mynasybetli-sazlasykly-gecirilen-careler/