Türkmenistanyň Bitaraplygyna bagyşlanan halkara maslahaty geçirildi
2021-nji ýylyň 24-nji dekabrynda «Kaspi – Ýewraziýa» halkara we jemgyýetçilik-syýasy gözleg merkezi bilen Astrahan döwlet tehniki uniwersitetiniň bilelikde gurnamagynda Türkmenistanyň Bitaraplygyna bagyşlanan halkara tegelek stol maslahaty onlaýn görnüşinde geçirildi.
Maslahatyň dowamynda Türkmenistanyň Russiýa Federasiýasy bilen ylym-bilim, medeni-ynsanperwer ugurlarda alyp barýan hyzmatdaşlygynyň ösüşi, bilelikdäki maksatnamalaryň durmuşa geçirilişi barada ara alnyp maslahatlaşyldy.
Sanly ulgam arkaly geçirilen bu tegelek stol maslahatyna Astrahan döwlet tehniki uniwersitetiniň halkara bölüminiň müdiri Ý.A.Ýukina, Magtymguly adyndaky Türkmen döwlet uniwersitetiniň Arheologiýa we etnologiýa kafedrasynyň uly mugallymy, taryh ylymlarynyň kandidaty B.H.Diwangulyýewa, Türkmenistanyň Daşary işler ministrliginiň Halkara gatnaşyklary institutynyň Jemgyýeti öwreniş ylymlary kafedrasynyň müdiri, filosofiýa ylymlarynyň kandidaty O.S.Ezimowa, Astrahan şäherindäki Magtymguly adyndaky orta mekdebiň türkmen dili mugallymy R.J.Şajyýew, Aktau şäherindäki Ş.Esenow adyndaky Tehnologiýalar we inženerçilik Kaspiý uniwersitetiniň “Ýaşyl tehnologiýalar” merkeziniň müdiri we ylmy-barlag institutynyň direktory N.Izteleu, Astrahan döwlet tehniki uniwersitetiniň 1-nji ýyl magistranty H.Bekiýewa dagy gatnaşdylar.
Şeýle hem bu halkara tegelek stol maslahatyna Astrahan döwlet tehniki uniwersitetiniň, Türkmenistanyň Daşary işler ministrliginiň Halkara gatnaşyklar institutynyň we Magtymguly adyndaky Türkmen döwlet uniwersitetiniň talyp ýaşlary sanly ulgam arkaly gatnaşdylar.
Döwletýar ARÇAMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.