“Türkmenistanyň Bitaraplygy: Parahatçylygyň, ynanyşmagyň, ösüşiň we dostlukly gatnaşyklaryň diplomatiýasy” atly ylmy-amaly maslahat
2021-nji ýylyň 8-nji dekabrynda Türkmenistanyň Daşary işler ministrliginiň Halkara gatnaşyklary institutynda Halkara Bitaraplyk güni mynasybetli “Türkmenistanyň Bitaraplygy: Parahatçylygyň, ynanyşmagyň, ösüşiň we dostlukly gatnaşyklaryň diplomatiýasy” atly ylmy-amaly maslahat geçirildi. Oňa institutyň professor-mugallymlary we talyplary gatnaşdylar.
Maslahatyň esasy mejlisiniň dowamynda “Türkmenistanyň hemişelik Bitaraplyk hukuk ýagdaýy – parahatçylygyň we ynanyşmagyň ýoly”, “Milli ýangyç-energetika toplumy we onuň ýurdumyzyň halkara hyzmatdaşlygyndaky orny”, “Türkmenistanyň saglygy goraýyş ulgamynda we lukmançylyk diplomatiýasynda ýeten sepgitleri”, şeýle hem “Türkmenistanyň Bitaraplyk syýasatynyň halkara gatnaşyklardaky ähmiýeti” atly temalar boýunça professor-mugallymlar we talyplar çykyş edip, baky Bitarap Türkmenistanyň dünýä döwletleri bilen alyp barýan deňhukukly we dostlukly halkara gatnaşyklary, Bitaraplyk hukuk ýagdaýynyň ýurduň milli ykdysadyýetine edýän oňaýly täsiri dogrusynda nygtap geçdiler. Temalar boýunça edilen çykyşlar maslahatyň täsirliligini has-da artdyrdy. Ylmy-amaly maslahat öz işini umumy mejlisden soňra bölümçelerde dowam etdi.
Gurbanjemal EGIRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.