Türkmenistanyň Birleşen Milletler Guramasynyň agzalygyna kabul edilen güni mynasybetli ýurdumyzyň ýokary okuw mekdepleriniň talyplarynyň arasynda bäsleşik geçirildi
2025-nji ýylyň 26-njy fewralynda Türkmenistanyň Birleşen Milletler
Guramasynyň agzalygyna kabul edilmeginiň güni mynasybetli Türkmenistanyň
Daşary işler ministrliginiň Halkara gatnaşyklary institutynyň guramagynda
ýurdumyzyň yokary okuw mekdepleriniň talyplarynyň (Türkmenistanyň Daşary
işler ministrliginiň Halkara gatnaşyklary instituty, Magtymguly adyndaky
Türkmen döwlet uniwersiteti, Halkara ynsanperwer ylymlary we ösüş uniwersiteti,
Türkmenistanyň Içeri işler ministrliginiň instituty) arasynda bäsleşik geçirildi.
Bäsleşik institutyň Halkara hukugy fakultetiniň Halkara hukugy we deňeşdirme
hukuk öwreniş kafedrasynyň “Ýaş hukukçylar” ylmy gurnagy we institutyň “Ýaş
alymlar” geňeşi tarapyndan guraldy.
Mälim bolşy ýaly, Birleşen Milletler Guramasynyň döredilmegine 79 ýyl
boldy. Bu abraýly gurama tarapyndan iki gezek ykrar edilen Bitarap döwlet
hökmünde Türkmenistan halkara giňişlikde işjeň syýasaty alyp barýar hem-de
BMG we onuň ýöriteleşdirilen edaralary bilen uzak ýyllaryň dowamynda netijeli
gatnaşyklary saklaýar. Şoňa görä-de, ýokary guramaçylykly geçirilen bu bäsleşik
halkara gatnaşyklarynda halkara hukugynyň ähli subýektleriniň arasynda
gatnaşyklary utgaşdyrmakda, ählumumy parahatçylygy hem-de howpsuzlygy
üpjün etmekde esasy orny eýeleýän Birleşen Milletler Guramasy we onuň işiniň
esasy ugurlary boýunça talyp ýaşlaryň bilimlerini artdyrmaga gönükdirilendir.
Bäsleşik üç tapgyrdan ybarat bolup 1-nji tapgyrynda, Birleşen Milletler
Guramasy bilen bagly düzülen soraglara jogap bermek, 2-nji tapgyrda, Birleşen
Milletler Guramasynyň Baş Assambleýasynyň immitirlenen sessiýasynda öz
döwletiniň adyndan çykyş etmek, şeýle-de 3-nji tapgyrda, dünýä döwletleriniň
baýdaklaryny ýatdan bilmek bilen baglanşykly soraglara jogap bermek boýunça
bäsleşdiler.
Bäsleşigiň netijeleri esasynda baş baýraga Tükmenistanyň Daşary işler
ministrliginiň Halkara gatnaşyklary instituty, 1-nji orna Magtymguly adyndaky
Türkmen döwlet uniwersiteti, 2-nji orna Türkmenistanyň Içeri işler ministrliginiň
instituty, 3-nji orna Halkara ynsanperwer ylymlary we ösüş uniwersitetinden
düzülen talyplar topary eýe boldular. Ýeňiji bolan toparlara Hormat hatlary we
ýadygärlik sowgatlary gowşuryldy.
Nursähet JOMARTOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.
Şeýle hem bu barada şu ýerden hem okap bilersiňiz: