“Türkmenistanda wodorod energetikasyny ösdürmegiň ähmiýeti” atly onlaýn ylmy-amaly maslahat
2022-nji ýylyň 8-nji aprelinde Türkmenistanyň Daşary işler ministrliginiň Halkara gatnaşyklary institutynda Türkmenistanyň Bilim ministrligi, Türkmenistanyň Energetika ministrligi Türkmenistanyň Döwlet energetika institutynyň “Gaýtadan dikeldilýän energiýa çeşmeleri” ylmy-önümçilik merkeziniň guramagynda “Türkmenistanda wodorod energetikasyny ösdürmegiň ähmiýeti” atly onlaýn ylmy-amaly maslahat geçirildi.
Maslahatyň çäklerinde “Wodorod energiýasy — gelejegiň energiýasy” temasy boýunça Ýagşygeldi Kakaýew adyndaky Halkara nebit we gaz uniwersitetiniň “Wodorod energiýasy” boýunça merkeziniň orunbasary Maksat Allamyradow, “Wodorod energetikasynyň geljegi: Halkara guramalary bilen hyzmatdaşlygyň çäklerinde täze mümkinçilikler” temasy boýunça Türkmenistanyň Inžener-tehniki we ulag kommunikasiýalary institutynyň mugallymy Gylyçmuhammet Joraýew, “Türkmenistanda energiýanyň geljegi uly bolan ugurlary ösdürmek boýunça halkara hyzmatdaşlygy” atly tema boýunça Türkmenistanyň Daşary işler ministrliginiň Halkara gatnaşyklary institutynyň mugallymy Akmuhammet Jumagulyýew, “Gaýtadan dikeldilýän energiýa çeşmelerinden peýdalanmak bilen ikilenji energiýa çeşmelerini öndürmegiň mümkinçilikleri” temasynda Türkmenistanyň Döwlet energetika institutynyň “Gaýtadan dikeldilýän energiýa çeşmeleri” ylmy-önümçilik merkeziniň uly ylmy işgäri Esger Ataýew, “Türkmenistanda wodorod ýangyjyny Gün we ýel energiýasynyň hasabyna öndürmegiň mümkinçilikleri” temasy boýunça Türkmenistanyň Inžener-tehniki we ulag kommunikasiýalary institutynyň mugallymy Baýmyrat Jumakulyýew, “Gaýtadan dikeldilýän energiýa çeşmeleri hünäri boýunça hünärmenleri taýýarlamakda innowasion tehnologiýalarynyň ähmiýeti” temasynda Türkmenistanyň Döwlet energetika institutynyň uly mugallymy Mähri Daňatarowa şeýle hem, “Wodorod energetikasy pes uglerodly tehnologik ösüşiň kepilidir” temasy boýunça Türkmenistanyň Inžener-tehniki we ulag kommunikasiýalary institutynyň mugallymy Aman Hojalyýew çykyş etdiler.
Maslahatda Türkmenistanda wodorod energetikasyny ösdürmegiň möhüm meseleleri boýunça hünärmenleriň arasynda pikir alyşmalar gurnaldy.
Maslahatyň ahyrynda oňa gatnaşyjylar şeýle uly işleri amala aşyrmaga giň ýol açan we yzygiderli mümkinçilikleri döredýän hormatly Prezidentimize öz hoşallyklaryny bildirdiler.
Güljahan GARLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň
I ýyl talyby.