TÜRKMENISTANDA TEMMÄKÄ GARŞY GÖREŞMEKLIGE BAGYŞLANAN WAGYZ-NESIHAT ÇÄRESI GEÇIRILDI
2024-nji ýylyň 10-njy maýynda Türkmenistanyň Daşary işler ministrliginiň Halkara gatnaşyklary “Türkmenistanda temmäkä garşy göreşmek boýunça ýokary we orta hünär okuw mekdeplerinde talyp ýaşlaryň arasynda zyýanly endikleriň ýaramaz täsirini düşündirmek, sagdyn durmuş we milli ahlak ýörelgelerini ýaýbaňlandyrmak maksady bilen bilelikde wagyz-nesihat çäresi” geçirildi.
Bu wagyz-nesihat çäresiniň esasy maksady ýaş nesliň, hususan-da, talyp ýaşlaryň arasynda tertip-düzgün, milli ahlak ýörelgelerini ýaýbaňlandyrmak, zyýanly endiklerden daşda durmaklygy ündemek, temmäki önümleriniň adam saglygyna ýetirýän zyýanyny düşündirmek, kanun bozulmalaryň öňüni almak, ýaşlaryň saglygyny, işjeňligini we ömrüni uzaltmagyň netijeli ýollaryny düşündirmek, bedenterbiýäniň adam saglygyna ýetirýän täsiri barada habarly etmek we ýaşlaryň bu meseleler barada düşünjesini ýokarlandyrmak, “Sagdyn durmuşda ýaşamaklygyň ýollary” ýörelgelerini berjaý etmekden ybarat boldy.
Duşuşygyň dowamynda Türkmenistanyň Içeri işler ministrliginiň 4-nji müdürliginiň wekili, polisiýanyň podpolkownigi Nepesgylyç Halymow, Türkmenistanyň Saglygy goraýyş we derman senagaty ministrliginiň wekili Akbibi Täçmämmedowa, Türkmenistanyň Demokratik partiýasynyň wekili Didar Meredow, Kärdeşler arkalaşygynyň Milli Merkeziniň wekili Parahat Kakajaýew dagylar çykyş etdiler. Duşuşykda çykyş edenler Garaşsyz Diýarymyzda türkmen jemgyýetiniň ahlak arassalygyny berjaý etmek, ýurdumyzyň geljegi bolan ýaşlarymyzy watansöýüjilik ruhunda terbiýelemek, zyýanly endiklerden gaça durmak, sagdyn durmuş ýörelgelerine eýermek, halal zähmet çekmek meselesine aýratyn uly ähmiýet berilýändigini nygtadylar. Olar serhoşlugyň adamyň saglygyna ýetirýän zyýanyny, maşgalanyň dargamagyna getirýändigini, çaganyň terbiýelenişine ýaramaz täsir edýändigini, spirtli içgileriň täsiri astynda adamlaryň özleriniň jemgyýet we döwlet öňündäki jogapkärçilik duýgularyny ýitirýändigini tekrarlamak bilen, ýaşlaryň arasynda ýörgünli bolup barýan “instagram”, “tiktok” ýaly sahypalaryň nogsanly taraplary, olarda ençeme adamlaryň özlerini mahabatlandyrýan suratlary ýerleşdirip, türkmençilige gelişmeýän ters hereketlere ýüz urýandyklary dogrusynda gürrüň etdiler.
Çykyş edenleriň aýtmaklaryna görä, ýurdumyzda maşgalalaryň durmuş goraglylygyny üpjün etmek barada hem yzygiderli aladalar edilýär. Ýaşlaryň arasynda sagdyn durmuş ýörelgesini wagyz etmekde, ýaş nesli watansöýüjilik ruhunda terbiýelemekde, olaryň ýaramaz endiklerden daşda bolmaklaryny gazanmakda alnyp barylýan işler oňyn netijelerini berýär. Häzirki möwsümleýin keselleriň ýüze çykýan döwründe halk lukmançylygynyň usullaryna ýüzlenmek maksadalaýykdyr. Ýüze çykyp biljek ýokanç keselleriň öňüni almakda hormatly Prezidentimiziň köp jiltli «Türkmenistanyň dermanlyk ösümlikleri» atly kitaplarynda türkmen topragynda bitýän ösümlikleriň melhemlik häsiýetleri barada giňişleýin maglumat berilýär. Ýokanç keselleri bejermekde dermanlyk ösümlikleriň içinde ýüzärligiň peýdasy has köpdür. Onuň tüssesiniň bakteriýalary we mikroblary ýok edýändigi ylmy nukdaýnazardan subut edilendir. Häzirki wagtda ýurdumyzyň sport desgalarynyň ählisinde ýüzärligi ýygy-ýygydan tüsseletmek, profilaktiki arassalaýyş işlerini geçirmek, antiseptik serişdeleri ulanmak işleri ýokary derejede guralyp, gündelik ýerine ýetirilýär.
Şeýle hem çykyş edenler ata-babalarymyzyň asyrlaryň dowamynda ynsan saglygyna zeper ýetirýän endiklere garşy göreşendiklerini, nusgawy şahyrymyz Magtymguly Pyragynyň zyýanly endikler barada döreden «Çilim çekmegil», «Munda çilimkeş», «Neşekeş», «Çilimkeş», «Naskeş», «Nas atan» ýaly goşgularynyň bagtyýar döwrümiziň sagdyn, ruhubelent ýaşlaryny terbiýelemekde we kemala getirmekde uly ähmiýetiniň bardygyny belläp geçdiler.
Wagyz-nesihat çäresiniň ahyrynda oňa gatnaşanlar ýurdumyzda sagdyn durmuş ýörelgeleriniň içgin ornaşmagy ugrunda ähli mümkinçilikleri döredip berýän hormatly Prezidentimize alkyş sözlerini aýtdylar.
Muhammetmyrat AMANMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.