Türkmenistanda DÖM-iň durmuşa geçirilmegine bagyşlanan tegelek stol
2023-nji ýylyň 20-nji martynda Türkmenistanyň Daşary işler ministrliginiň Halkara gatnaşyklary institutynyň foýesinde Türkmenistanda Durnukly ösüş maksatlarynyň durmuşa geçirilmegine bagyşlanan tegelek stol geçirildi. Bu çärä Halkara guramalaryň Türkmenistanda ýerleşýän wekilhanalarynyň wekilleri, Türkmen diplomatiýasynyň milli mekdebiniň professor-mugallymlary hem-de talyplary gatnaşdylar.
Tegelek stoluň alyp baryjysy hökmünde Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň mugallymy Akmuhammet Jumagulyýew çykyş etdi. Çäräniň dowamynda Bütindünýä saglygy goraýyş guramasynyň (BSGG) Türkmenistan boýunça edarasynyň başlygy Ýegor Zaýsew, Birleşen Milletler Guramasynyň Ilat Gaznasynyň (UNFPA) ýurt edarasynyň başlygy Aýna Seýitliýewa, Halkara Migrasiýa Guramasynyň (HMG) Türkmenistandaky edarasynyň başlygy Timur Dosmammedow, Birleşen Milletler Guramasynyň Neşe serişdelerine we jenaýatçylyga garşy göreşmek boýunça edarasynyň (UNODC) Türkmenistandaky edarasynyň başlygy Çary Ataýew, BMG-niň Ösüş Maksatnamasynyň (BMGÖM) Hemişelik wekiliniň orunbasary Tomisa Paowiç, BMG-niň Merkezi Aziýa üçin Öňüni alyş diplomatiýasy boýunça Sebit Merkeziniň (UNRCCA) başlygynyň orunbasary Filip Saprykin, BMG-niň Çagalar Gaznasynyň Türkmenistandaky (UNICEF) wekiliniň orunbasary Aleksandru Nartea dagylar Türkmenistanyň BMG-niň Ösüş Maksatnamasynyň çäginde kabul edilen Durnukly ösüş maksatlarynyň ýurdumyzda durmuşa geçirmek babatda alnyp barylýan işler barada çykyş etdiler.
Tegelek stoluň ahyrynda gatnaşyjylar özara pikir alyşdylar, şeýle hem myhmanlar institutymyzda ýerleşýän Türkmen diplomatiýasynyň taryhy muzeýine gezelenç etdiler.
Döwletýar ARÇAMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.