“TÜRKMENISTAN – ÝUNISEF: BAGTLY ÇAGALYK UGRUNDAKY HYZMATDAŞLYK” ATLY TÄSIRLI YLMY SEMINAR
2024-nji ýylyň 29-njy maýynda Türkmenistanyň Daşary işler ministrliginiň Halkara gatnaşyklary institutynda Çagalary goramagyň halkara güni mynasybetli “Ýaş žurnalistler” ylmy-döredijilik gurnagynyň guramagynda “Türkmenistan – ÝUNISEF: bagtly çagalyk ugrundaky hyzmatdaşlyk” atly ylmy seminar geçirildi. Ylmy seminaryň işine gatnaşan “Ýaş žurnalistler” ylmy-döredijilik gurnagynyň işjeň agzalary täsirli çykyş etdiler. Olar öz çykyşlarynda dünýäniň 190 döwletinde, şol sanda Türkmenistanda, çagalaryň hukuklaryny öňe sürýän we goraýan gurama bolan ÝUNISEF-iň taryhy, onuň bütin dünýäde, şeýle-de ýurdumyzda alyp barýan işleri barada gürrüň berdiler. 1994-nji ýyldan bäri ÝUNISEF-iň Türkmenistandaky wekilhanasy tarapyndan Türkmenistan bilen bilelikde alnyp barylýan hyzmatdaşlygyň çäklerinde ýurduň Çaganyň hukuklary hakyndaky konwensiýa we Maýyplygy bolan adamlaryň hukuklary hakyndaky konwensiýa laýyklykda, çagalaryň hukuklaryny berjaý etmek boýunça üstüne alan borçnamalaryny ýerine ýetirmekde berýän ýardamlary barada giňişleýin aýtdylar. Seminaryň dowamynda pikir alyşmak maksatly berlen sowallar talyplarda uly gyzyklanma döredip, seminaryň işiniň täsirini has-da artdyrdy.
Kyýas AKMÄMMEDOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
I ýyl talyby.