16/11/2023
1161
Türkmenistan we Täjigistan Respublikasynyň arasyndaky hyzmatdaşlyga bagyşlanan duşuşyk
2023-nji ýylyň 16-njy noýabrynda Türkmenistanyň Daşary işler ministrliginiň Halkara gatnaşyklary institutynda türkmen-täjik gatnaşyklarynyň ösdürilmegi üçin Täjigistan Respublikasynyň Türkmenistandaky Adatdan daşary we Doly ygtyýarly Ilçi jenap Wafo Alibek Niýatbekzoda bilen Türkmenistanyň Daşary işler ministrliginiň Halkara gatnaşyklary institutynyň rektory J.Gurbangeldiýewiň arasynda duşuşyk geçirildi.
Duşuşygyň dowamynda institutyň rektory institutda hereket edýän okuw we ylmy merkezleri barada, şeýle hem iki ýurduň ýokary okuw mekdepleriniň arasyndaky, dostlukly ýurtlaryň gatnaşyklary, özara bähbitli hyzmatdaşlyk barada giňişleýin gürrüň berdi. Mundan başga-da, taraplar Halkara gatnaşyklary instituty we Täjigistan Respublikasynyň ýokary okuw mekdepleriniň arasyndaky hyzmatdaşlygy has-da ösdürmek babatda birnäçe teklipler ara alyp maslahatlaşyldy.
Resmi duşuşykdan soňra jenap Wafo Alibek Niýatbekzoda üçin gurnalan gezelenjiň dowamynda abraýly myhman institutyň halkara gatnaşyklary boýunça türk we iňlis dillerindäki kitaphanasy, türkmen diplomatiýasynyň taryhynyň muzeýi, «Parahatçylygyň ýaş çaparlary» akyl-paýhas bäsleşigi geçirilýän türkmeniň Ak öýi we institutyň okuw studiýasy bilen ýakyndan tanyş boldy.
Merdan BERDINYÝAZOW,
Türkmenistanyň DIM-niň
Halkara gatnaşyklary institutynyň uly mugallymy