Türkmenistan — ŞHG: ählumumy parahatçylygyň bähbidine hyzmatdaşlyk
Berkarar döwletimiziň täze eýýamymyzyň Galkynyşy döwründe hormatly Prezidentimiziň baştutanlygynda ýurdumyzda sebitde we dünýäde oňyn gatnaşyklary ösdürmekde hemişelik Bitaraplyk derejesine esaslanýan daşary syýasatymyzyň ugurlary yzygiderli durmuşa geçirilýär. Bu ugurda halkara guramalary we düzümleri, şol sanda Şanhaý Hyzmatdaşlyk Guramasy bilen hem netijeli hyzmatdaşlyk pugtalandyrylýar.
Häzirki döwürde dünýäde bolup geçýän çylşyrymly ýagdaýlar, parahatçylyk söýüjilik ýörelgelerine eýerýän döwletleriň aýratyn jogapkärçiligini, jebisligini, ählumumy we sebit howpsuzlygyny saklamak işine işjeň goşant goşmaklaryny talap edýär. Bu ugurda düzümine birnäçe döwletler girýän ŞHG-niň alyp barýan işleri hem uly ähmiýete eýedir.
Şanhaý Hyzmatdaşlyk Guramasy ýa-da Şanhaý Pakty öz adyny bu ugurda birinji duşuşygyň geçirilen ýeri bolan Şanhaý şäherinden alýar. 1996-njy ýylyň 26-njy aprelinde Guramanyň ilkinji mejlisi Şanhaýda geçirildi. Bu Gurama häzirki döwürde halkara giňişliginde özara bähbitli döwletara hyzmatdaşlygy ösdürmek üçin ygtybarly binýat bolup durýar. Şanhaý Hyzmatdaşlyk Guramasyna agza döwletler bilen biziň ýurdumyzy hoşniýetli, taryhy taýdan emele gelen medeni we ruhy gymmatlyklaryň umumylygy, däp bolan dostlukly hem-de hoşniýetli goňşuçylyk gatnaşyklary baglanyşdyrýar.
Türkmenistanyň Şanhaý Hyzmatdaşlyk Guramasynyň sammitlerine hormatly myhman hökmünde yzygiderli gatnaşmagy Watanymyzyň dünýä derejesinde abraýynyň artýandygyna, ikitaraplaýyn hem-de köptaraplaýyn görnüşde netijeli özara hereketleri ösdürmek meselelerinde ýurdumyzyň işjeň çykyş etmek ýörelgesine eýerýändigine aýdyň şaýatlyk edýär.
Türkmenistan ŞHG bilen syýasy-ykdysady, söwda, maýa goýum, medeni-ynsanperwer ugurlarda hyzmatdaşlygyň köptaraplaýyn, çeýe görnüşleri we usullary arkaly gatnaşyklary alyp barýar. Döwletimiz Şanhaý Hyzmatdaşlyk Guramasy bilen hususyýetçiligi ösdürmek, telekeçileriň yzygiderli gatnaşyklary üçin şertleri döretmek boýunça has ýakyn, netijeli hyzmatdaşlyk ugrunda çykyş edýär. Türkmenistan birnäçe döwletleriň — Şanhaý Hyzmatdaşlyk Guramasynyň agzalarynyň, synçylarynyň ýurdumyzyň başlangyjy boýunça BMG-de döredilen parahatçylygyň, howpsuzlygyň we durnukly ösüşiň bähbidine Bitaraplygyň dostlary toparyna goşulmagyna ýokary baha berýär.
Berkarar döwletimiziň täze eýýamynyň Galkynyşy döwründe Garaşsyz, Bitarap döwletimiziň sebitde we dünýäde parahatçylygy berkitmek, işjeň hyzmatdaşlygy ösdürmek boýunça Şanhaý Hyzmatdaşlyk Guramasy bilen alyp barýan hoşniýetli gatnaşyklary dünýäde barha möhüm ähmiýete eýe bolýar.
Aýgül MÄMMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 2-nji ýyl talyby.