Dubaýdan Baku barýan ýol – Pre COP29
2024-nji ýylyň 12-nji iýunynda Daşky gurşawy goramagyň bütindünýä güni we Azerbaýjan Respublikasynyň Baku şäherinde geçiriljek BMG-niň howanyň üýtgemegi baradaky Çarçuwaly konwensiýasyna gatnaşyjy taraplaryň 29-njy maslahatyna (COP 29) taýýarlyk görmek maksady bilen, BMG-niň Türkmenistandaky wekilhanasynyň, Birleşen Arap Emirlikleriniň Türkmenistandaky Ilçihanasynyň we Türkmenistanyň Daşary işler ministrliginiň gurnamagynda duşuşyk geçirildi.
Duşuşyga BMG-niň wekilleri, diplomatik işgärler, milli hyzmatdaşlar, Durnukly ösüş maksatlarynyň (DÖM) Ýaş ilçileri we meýletinçiler gatnaşdylar. Duşuşygyň dowamynda BAE-nyň Türkmenistandaky ilçisi Ahmed Al-Hameli, BMG-niň Türkmenistandaky Hemişelik utgaşdyryjysy Dmitriý Şlapaçenko, Azerbaýjan Respublikasynyň Türkmenistandaky ilçisi Gismet Gezalow, Türkmenistanyň Daşky gurşawy goramak ministriniň orunbasary çykyş etdiler. Olar howanyň üýtgemegine garşy göreşde we durnukly ösüş maksatlaryna ýetmekde hyzmatdaşlygy has-da ösdürmelidigini bellediler. Şeýle-de duşuşykda Türkmenistanyň Daşary işler ministrliginiň geňeşçisi Magtymguly Akmyradow çykyş edip, çözgütleri ilerletmekde we global hyzmatdaşlygy güýçlendirmekde bilimiň we diplomatiýanyň möhüm orny eýeleýändigini belläp geçdi.
Duşuşykda DÖM-iň Ýaş ilçisi Gülşat Aýydowa «2024-nji ýylyň Türkmenistanyň howanyň üýtgemegi boýunça Milli ýaşlar maslahatynyň Ýol kartasy» bilen tanyşdyrdy. Bu strategiki maksatnama ýaşlaryň howanyň üýtgemegine garşy göreşdäki başlangyçlaryny goldamaga gönükdirilendir. Howanyň üýtgemegi boýunça Milli ýaşlar maslahatyna (LCOY) gatnaşyjylar özleriniň gymmatly tejribelerini paýlaşyp, geljekde howanyň üýtgemegi boýunça geçiriljek halkara sammitler barada öz pikirlerini we tekliplerini berdiler.
Bu duşuşyk Türkmenistanyň we onuň hyzmatdaşlarynyň ýaşlaryň gatnaşygyny höweslendirmek we howanyň üýtgemegine garşy göreşde halkara hyzmatdaşlygyny güýçlendirmäge ygrarlydyklaryny görkezdi. Azerbaýjan Respublikasynyň BMG-niň howanyň üýtgemegi baradaky Çarçuwaly konwensiýasynyň gatnaşyjy taraplaryň 29-njy maslahatyna (COP 29) ýolbaşçylyk etmegi aýdyň geljegi döredip, onda ýaşlara durnukly geljegi döretmekde möhüm orun berilýär.
Ýupar EGIRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň III ýyl talyby,
Durnukly ösüş maksatlarynyň Ýaş ilçisi.