Türkmen wekiliýeti Ýewropa Bileleşiginiň daşary syýasaty boýunça okuwlara gatnaşdylar
2024-nji ýylyň 13–24-nji maýy aralygynda Türkmenistanyň Daşary işler ministrliginiň, Bilim ministrliginiň, Maliýe we ykdysadyýet ministrliginiň, Daşary işler ministrliginiň Halkara gatnaşyklary institutynyň wekilleri Belgiýa Patyşalygynyň Brýussel we Brýugge şäherinde geçirilen Ýewropa Bileleşiginiň daşary syýasy işi boýunça Merkezi Aziýa döwletleriniň diplomatlary we hünärmenleri üçin ýöriteleşdirilen okuwlara gatnaşdylar.
Iki hepdelik okuw sapaklary Ýewropa Bileleşigi tarapyndan maliýeleşdirilip, Ýewropanyň daşarky hereket gullugynyň hem-de Daşary syýasat gurallary gullugynyň başlangyçlary esasynda GOPA PACE we Ýewropa Kolleji tarapyndan guraldy.
Okuw sapaklarynyň dowamynda diňleýjilere Ýewropa Kollejiniň çakylyk boýunça professorlary hem-de Ýewropanyň daşarky hereket gullugynyň hünärmenleri, şol sanda kollejiň rektory hanym Federika Mogerini we Ýewropa Bileleşiginiň Merkezi Aziýa boýunça Ýörite wekili hanym Terhi Hakala ÝB-niň daşary syýasaty, onuň düzümi, agza döwletleriň arasynda ylalaşyklaryň gazanylyşy, ikitaraplaýyn we köptaraplaýyn gepleşikleriň geçirilişi, Bileleşik tarapyndan girizilýän sanksiýalaryň kabul edilişi, şeýle hem ÝB-niň Merkezi Aziýa döwletleri bilen gatnaşyklary barada giňişleýin gürrüň berdiler.
Okuw sapaklary Ýewropa Bileleşigi bilen Merkezi Aziýa döwletleriniň arasynda hyzmatdaşlygy ösdürmekde has täsirli gatnaşyklary gazanmak maksady bilen geçirildi.
Rahym AKMURADOW,
Türkmenistanyň Daşary işler ministrliginiň
Halkara gatnaşyklary institutynyň öwreniji mugallymy.