Türkmen-türk gatnaşyklaryna bagyşlanan duşuşyk geçirildi
2022-nji ýylyň 22-nji dekabrynda Türkmenistanyň Daşary işler ministrliginiň Halkara gatnaşyklary institutynda Durnukly ösüş maksatlary boýunça ylmy-usulyýet Merkeziniň çäklerinde (DÖMYUM) Türkmenistanyň Türkiýe Respublikasyndaky Adatdan daşary we Doly ygtyýarly Ilçisi Mekan Işangulyýewiň, şeýle hem institutyň talyplarynyň gatnaşmagynda okuw sapagy geçirildi. Bu okuw sapagy Türkmenistan-Azerbaýjan-Türkiýe üçtaraplaýyn formatyndaky I duşuşygyň ähmiýetine bagyşlanyp, onuň barşynda Ilçi talyplara türkmen-türk gatnaşyklarynyň, ýagny bu iki ýurduň arasynda alnyp barylýan diplomatik, syýasy, ykdysady, medeni, söwda, ylym-bilim ugurly gatnaşyklary dogrusynda giňişleýin gürrüň berdi.
Şeýle hem diplomat talyplara ýurdumyz bilen Türkiýe Respublikasynyň arasynda ýola goýlan ýurt, sebit we dünýä ähmiýetli ikitaraplaýyn hyzmatdaşlyk hem-de 2021-nji ýylyň 12-nji noýabrynda Gahryman Arkadagymyzyň Türkiýe Respublikasyna amala aşyran iş sapary we saparyň çäklerinde Döwlet Baştutany Türki dilli döwletleriň hyzmatdaşlyk geňeşiniň (Türki geňeşiň) nobatdaky Sammitiniň işine gatnaşmagy we onuň çäklerinde baglaşylan ylalaşyklar dogrusynda gürrüň berdi.
Ilçi 2022-nji ýylyň 14-nji dekabrynda "Awaza" milli syýahatçylyk zolagynyň Kongresler merkezinde geçirilen Türkmenistanyň, Azerbaýjan Respublikasynyň, Türkiýe Respublikasynyň birinji üçtaraplaýyn sammitini aýratyn belläp, bu üçtaraplaýyn sammitiň çäklerinde gol çekilen resminamalardyr ylalaşyklar barada giňişleýin nygtady.
Okuw sapagynyň ahyrynda talyplar Ilçä özlerini gyzyklandyrýan sowallary bilen ýüzlenip, olara giňişleýin jogap aldylar. Türkmen-türk gatnaşyklaryna bagyşlanyp geçirilen okuw sapagy talyplarda uly täsir galdyrdy.
Aziza HUDAÝNAZAROWA,
Türkmenistanyň Daşary işler ministrliginiň
Halkara žurnalistikasy fakultetiniň
Halkara gatnaşyklary institutynyň II ýyl talyby.