Taryhy gala täsirli gezelenç
2024-nji ýylyň 5-nji aprelinde Türkmenistanyň Daşary işler ministrliginiň Halkara gatnaşyklary institutynyň Ýaş diplomatlaryň mekdebiniň işjeň agzalary bolan mekdep okuwçylarynyň we talyp ýaşlaryň gatnaşmagynda ÝUNESKO-nyň Bütindünýä medeni mirasynyň sanawyna girizilen «Nusaýyň Parfiýa galalary» döwlet medeni-taryhy ýadygärligine gezelenç guraldy.
Gezelenjiň dowamynda Parfiýa döwletiniň diplomatik gatnaşyklaryna bagyşlanan göçme okuw sapagy we ylmy-seminary geçirildi. Göçme okuw sapagynda Türkmenistanyň Daşary işler ministrliginiň Halkara gatnaşyklary institutynyň jemgyýeti öwreniş ylymlary kafedrasynyň uly mugallymy, taryh ylymlarynyň kandidaty Aýna Baýmuradowa Ýaş diplomatlaryň mekdebiniň agzalaryna Parfiýa döwletiniň Hytaý, Rim ýaly döwletler bilen alyp baran diplomatik gatnaşyklary, döwletiň medeniýeti, Nusaý galalarynyň ajaýyp binagärlik aýratynlyklary barada gyzykly gürrüňler berdi. Şeýle-de Ýaş diplomatlaryň mekdebiniň agzalary, ýagny institutymyzyň talyplary we mekdep okuwçylary şol taryhy döwrüň diplomatik gatnaşyklary barada özara söhbetdeşlik edip, pikir alyşdylar.
Bäş müň ýyllyk şöhratly taryhy bolan türkmen topragynda ýerleşýän taryhy galalardyr ýadygärliklere şeýle gezelençleriň yzygiderli guralmagy türkmen diplomatiýasynyň geljekki wekilleri bolan Ýaş diplomatlaryň mekdebiniň agzalarynyň goşmaça bilim endikleriniň has-da kämilleşmegine uly goşant goşýar. Gezelenje gatnaşyjylar ýurdumyzda ýaş nesilleriň ukyp-başarnyklaryny, zehin aýratynlyklaryny ýüze çykarmaga döredilýän giň mümkinçilikler üçin hormatly Prezidentimize alkyş sözlerini aýtdylar.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.