TARYH – GELJEGE ŞAMÇYRAG
2024-nji ýylyň 24-nji dekabrynda Türkmenistanyň Daşary işler ministrliginiň Halkara gatnaşyklary institutynda jemgyýeti öwreniş ylymlary kafedrasynda hereket edýän “Paýhas we parasat” ylmy gurnagynyň guramagynda institutymyzyň I ýyl talyplarynyň arasynda “Taryh – geljege şamçyrag” atly ylmy-seminar we bäsleşik geçirildi. Bäsleşigiň başynda jemgyýeti öwreniş ylymlary kafedrasynyň mugallymy Suraý Akmyradowa bäsleşigiň aýratynlyklary barada gürrüň berdi we talyplary bäsleşigiň şertleri bilen tanyşdyrdy.
Bäsleşigiň şertlerine laýyklykda, ilki bilen gatnaşyjylar öz toparlaryny tanyşdyrdylar, saýlap alan “Aziýa we Afrika ýurtlarynyň taryhyna ” degişli temalary boýunça gyzykly maglumatlar we prezentasiýalar bilen çykyş etdiler, mugallymlaryň taýýarlan soraglaryna jogap berdiler, dünýä döwletleriniň ýerleşişini, baýdaklaryny we paýtagtlaryny bilmek boýunça öz aralarynda bäsleşdiler.
Çekeleşikli geçen bäsleşikde “Musafiru al-Zaman” ady bilen çykyş eden institutymyzyň halkara gatnaşyklary fakultetiniň talyplary garşydaşlaryndan üstün çykmagy başardylar we I orna mynasyp boldular. Bäsleşikde II orna halkara žurnalistikasy fakultetiniň “Ýaş türkmenler” topary, III orna halkara ykdysady gatnaşyklary fakultetiniň “Meýdzi isin” topary mynasyp boldy. Ýeňijilere “Paýhas we parasat” atly ylmy gurnagy tarapyndan taýýarlanan hormat hatlar we sowgatlar gowşuryldy.
Maksat ALYMBAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.