Tanyşdyrylyş dabarasy
2021-nji ýylyň 26-njy fewralynda Türkmenistanyň Türkiýe Respublikasyndaky Baş konsullygynyň gurnamagynda Stambul uniwersitetiniň Jerrahpaşa ýokary okuw mekdebinde Türkmenistanyň Garaşsyzlygynyň şanly 30 ýyllygy mynasybetli ylmy maslahat we Türkmenistanyň Prezidentiniň çuňňur paýhasyndan dörän «Türkmeniň döwletlilik ýörelgesi» atly kitabynyň türk dilindäki nusgasynyň tanyşdyrylyş dabarasy geçirildi. Dabara Türkmenistanyň Daşary işler ministrliginiň Halkara gatnaşyklary institutynyň professor – mugallymlary we talyplary göni wideoaragatnaşyk arkaly gatnaşdylar.
Tanyşdyrylyş dabarasynyň başynda hormatly Prezidentimiziň ýolbaşçylygynda halkymyzyň medeni mirasyny hemmetaraplaýyn öwrenmek we giňden wagyz etmek boýunça alnyp barylýan uly işleriň örän möhümdigi nygtaldy. Häzirki döwürde halkara gatnaşyklarynda medeni hyzmatdaşlyk dünýä halklarynyň özara düşünişmegini goldamagyň, şeýle hem syýasy we ykdysady taýdan gatnaşyk etmekleri üçin oňaýly ýagdaýlary döretmegiň möhüm guraly hökmünde düşünilýär. Şonuň üçin hem, «Türkmeniň döwletlilik ýörelgesi» kitabynda beýan edilýän gadymyýetden gözbaşyny alyp gaýdýan däp-dessurlarymyz hem-de umumadamzat bähbitli öwüt – ündewlerimiz, ýörelgelerimiz ähli halklarda uly gyzyklanma tapýar. Dabarada bellenilişi ýaly, sentýabr aýynda neşir edilen bu kitabyň hytaý, ýapon, rus, azerbaýjan, gruzin we ukrain dillerine terjime edilmegi, şeýle hem bu sanawa kitabyň türk diline terjime edilen görnüşiniň goşulmagy doganlyk halklaryň medeni gatnaşyklarynyň güýçli depginler bilen ösýandiginiň aýdyň subutnamasydyr.
Dabarada çykyş edenler iki doganlyk halkyň taryhy – medeni we ruhy umumylygyny, özara bähbitli hyzmatdaşlyk etmäge tarap ýörelgelere ygrarlydygyny, dostlukly türkmen – türk gatnaşyklarynyň mizemez binýady bolup durýandygyny nygtadylar.
Dabaranyň ahyrynda oňa gatnaşanlar bu kitabyň dostlukly gatnaşyklaryň ösmeginde uly goşant boljakdygyny belläp, mähriban Arkadagymyzyň janynyň sag, ömrüniň uzak, alyp barýan il – ýurt bähbitli işleriniň mundan beýläk-de rowaçlyklara beslenmegini arzuw etdiler.
Gurbanjemal EGIRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.