Talyplaryň Halkara ynsanperwer hukugy boýunça halkara bäsleşikde üstünlikli çykyşy
2023-nji ýylyň 9-12-nji oktýabry aralygynda Türkmenistanyň Daşary işler ministrliginiň Halkara gatnaşyklary institutynyň talyplar topary Halkara Gyzyl Haç Komitetiniň gurnamagynda Russiýa Federasiýasynyň Ýaroslaw welaýatynda geçirilen iň abraýly bäsleşikleriň biri hasaplanýan F.F.Martens adyndaky Halkara ynsanperwer hukugy boýunça bäsleşige gatnaşyp, dünýäniň birnäçe ýokary okuw mekdepleriniň arasynda üstünlikli çykyş edip, gowy netijeleri gazanmagy başardylar.
F.F.Martensiň adyny göterýän bu bäsleşige Türkmenistanyň Daşary işler ministrliginiň Halkara gatnaşyklary institutynyň talyplar topary eýýäm birnäçe ýyldan bäri gatnaşyp gelýärler. Bu bäsleşik Gyzyl Haç Halkara Komitetiniň (HGHK) gurnamagynda GDA ýurtlarynyň öňdebaryjy hukuk bilimlerini berýän uniwersitetleriniň talyplarynyň arasynda geçirilýär.
Bu ýyl Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň uly mugallymy Dürli Ballyýewanyň ýolbaşçylygyndaky talyplardan ybarat bolan topar, ýagny Kerwen Muhammetgeldiýew, Serdar Rahimow we Döwletgeldi Babakuliýew 23 döwletiň ýokary okuw mekdepleriniň arasynda bäsleşige gatnaşmaga hukuk gazandylar.
Bäsleşigiň netijelerine görä, Türkmenistanyň Daşary işler ministrliginiň Halkara gatnaşyklary institutynyň topary gowy netijeleri görkezip, emin agzalary tarapyndan ýokary baha berildi. Emin agzalary tarapyndan toparlary kesgitlemekde halkara ynsanperwer hukugy we halkara hukugy baradaky bilimlerini, bu baradaky pikirlerini erkin beýan edip bilmek, bu meselelerde ýüze çykýan çylşyrymly ýagdaýlary boýunça jedel etmek we olary çalt çözmek ukyplary göz öňünde tutuldy.
Şeýle bäsleşiklere gatnaşmak, halkara hukugy boýunça bilimleri çuňlaşdyrmaga we halkara ynsanperwer hukugynyň iş ýüzünde nähili işleýändigine düşünmäge mümkinçilik döredýär, şeýle hem ýurdumyzyň halkara hyzmatdaşlygynyň has-da artmagyna ýakyndan ýardam edýär.
Umyt ANNAGYLYJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň IV ýyl talyby