TALYPLARYMYZYŇ HALKARA BÄSLEŞIGINDÄKI ÝEŇŞI
2026-njy ýylyň 24 — 27-nji marty aralygynda Türkmenistanyň Döwlet energetika institutynda ýurdumyzyň ýokary okuw mekdepleriniň talyplarynyň arasynda “Nazary mehanika” dersi boýunça internet olimpiadasy geçirildi.
Bu olimpiadada 760-dan gowrak talyp “Nazary mehanika” dersi boýunça bilimini we başarnygyny synadylar. Halkara açyk internet olimpiada daşary ýurtlaryň birnäçesinden ýagny, Russiýa Federasiýasynyň, Belarus Respublikasynyň, Özbegistan Respublikasynyň, Gazagystan Respublikasynyň, Gyrgyz Respublikasynyň, Azarbeýjan Respublikasynyň, Hytaý Halk Respublikasynyň, Rumyniýa Respublikasynyň, Saud Arabystanyň, Kamboja Patyşalygynyň, Hindistan Respublikasynyň, Günorta Sudanyň, Türkiýe Respublikasynyň, Amerikanyň Birleşen Ştatlarynyň, Wýetnam Respublikasynyň, Malaýziýanyň 97 sany ýokary okuw mekdeplerinde bilim alýan talyplaryň 570-e golaýy gatnaşdy. “Nazary mehanika” dersi boýunça Açyk halkara internet olimpiadasyna her ýyl yzygiderli gatnaşýan daşary ýurtly talyplaryň sanlarynyň artmagy, onuň çekeleşikli geçendigini, şeýle hem onuň ýaşlaryň arasynda dostlukly gatnaşyklary berkitmekde, talyplaryň dünýägaraýşyny we bilimlerini giňeltmekde ähmiýetli çäre bolup durýandygy bellärliklidir. Halkara internet olimpiadasy 5 gün dowam edip, jemleýji gününde şahsy we toparlaýyn bäsleşikde ýeňiji bolan talyplar degişli diplomlar we höweslendiriji baýraklar bilen sylaglandy.
Olimpiadanyň netijeleri boýunça Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň 1-nji ýyl talyby Hallymämmet Baýramow III orna mynasyp bolup, diplom bilen sylaglandy, toparlaýyn dereje-de bolsa şol fakultetiň III ýyl talyby Dawut Gezerow, I ýyl talyby Ysmaýyl Çaryberdiýew III derejeli diplom bilen sylaglandylar. Bu üstünlik talyplaryň ylym-bilime bolan höwesiniň ýokarydygyny, şeýle hem olaryň geljekde öz hünär ugurlary boýunça uly üstünlikleri gazanmaga ukyplydygyny aýdyň görkezýär.
Batyr KAKAJANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 1-nji ýyl talyby.