Talyplarymyzyň döredijilik üstünlikleri
Hormatly Prezidentimiziň parasatly baştutanlygynda ýurdumyzda ýaşlar barada döwlet syýasaty üstünlikli durmuşa geçirilýär. Ýaş nesli bilime we döredijilige has-da höweslendirmek üçin uly işler alnyp barylýar. Ukyply, zehinli ýaşlary ýüze çykarmak maksady bilen, ýurdumyzyň jemgyýetçilik guramalary, gazet-žurnallaryň redaksiýalary, ýokary okuw mekdepleri tarapyndan döredijilik bäsleşikleri yzygiderli guralýar. Şeýle guralýan bäsleşiklere institutymyzyň talyp ýaşlary hem özleriniň goşgudyr hekaýalary hem-de makalalary bilen işjeň gatnaşýarlar. Ýaňy ýakynda talyplarymyzyň birnäçesi döwletimiziň hemişelik Bitaraplygynyň 26 ýyllyk baýramy mynasybetli geçirilen döredijilik bäsleşiklerine gatnaşyp, baýrakly orunlara mynasyp boldular. Has takygy, Magtymguly adyndaky Türkmen döwlet uniwersitetiniň yglan eden «Bitaraplyk — buýsanjymyz» atly makala ýazmak bäsleşigiň ikinji derejesinde žurnalistika hünäri boýunça bilim alýan ýaşlaryň arasynda baýrakly üçünji orny institutymyzyň Halkara žurnalistikasy fakultetiniň 4-nji ýyl talyby Aýsenem Ataýewa eýelemegi başardy. Şeýle-de, Türkmen oba hojalyk institutynda 2021-nji ýylyň 1-nji noýabryndan 1-nji dekabry aralygynda «Türkmen obasy — bagtyýarlyk mekany” ady bilen geçirilen döredijilik bäsleşiginde makala ýazmak boýunça institutymyzyň Halkara žurnalistikasy fakultetiniň 1-nji ýyl talyby Gurbanmyrat Aşyrow üçünji orna, goşgy ýazmak boýunça institutymyzyň Halkara žurnalistikasy fakultetiniň 4-nji ýyl talyby Sona Halykowa ikinji orna, hekaýa ýazmak boýunça institutymyzyň Halkara žurnalistikasy fakultetiniň 2-nji ýyl talyby Gunça Hamedowa üçünji orna mynasyp bolmagy başardylar. Talyplarymyzyň şeýle üstünlikleri bizi diýseň buýsandyrýar we guwandyrýar. Goý, Gahryman Arkadagymyzyň sargytlaryndan ruhlanyp ýaşaýan talyp deň-duşlarymyzyň ylym we döredijilik dünýäsindäki ýeňişleriniň yzy gür bolsun!
Batyrmuhammet ORAZOW,
Türkmenistanyň Daşary işler ministrliginiň
Halkara gatnaşyklary institutynyň 1-nji ýyl talyby.