“TALYP JOŞGUNY – 2025” ATLY DÖREDIJILIK FESTIWALY
a2025-nji ýylyň 22-nji maýynda Türkmenistanyň Daşary işler ministrliginiň
Halkara gatnaşyklary institutynda Türkmenistanyň Magtymguly adyndaky Ýaşlar
guramasynyň Merkezi Geňeşiniň hem-de Türkmenistanyň Bilim ministrliginiň
bilelikde guramaklarynda, Hormatly Prezidentimiziň asylly ýörelgelerinden ugur
alyp, çeper höwesjeň talyp ýaşlarynyň arasynda 2025-nji Halkara parahatçylyk we
ynanyşmak ýylynda ýurdumyzyň belent ösüşlerini joşgunly wasp etmek,
halkymyzyň milli medeniýetiniň many-mazmunyny ýaş nesle öwretmek, talyp
ýaşlaryň aýdym-saz we tans sungatynda zehin başarnyklaryny açyp
görkezmek maksady bilen “Talyp joşguny – 2025” atly döredijilik festiwaly
dabaraly ýagdaýda geçirildi. Döredijilik festiwalyna institutyň bagtyýar talyp
ýaşlary işjeň gatnaşdylar.
Festiwal edebi-sazly kompozisiýa, goşgylary çeper okamak, institutyň talyp
gyzlarynyň taýýarlan tanslary, degişme sahnasy, halk döredijiliginden bir parça
şeýle-de, institutymyzyň höwesjeň talyplarynyň ýerine ýetirmeginde
Watanymyzyň ösüşlerini wasp edýän aýdym bilen utgaşyp, şatlyk-şowhuna
beslendi.
Berkarar döwletiň täze eýýamynyň Galkynyşy döwründe Gahryman
Arkadagymyzyň saýasynda Arkadagly Gahryman Serdarymyzyň parasatly
baştutanlygynda ähli ulgamlarda giň möçberli maksatnamalar, döwrebap
taslamalar üstünlikli durmuşa geçirilýär. Milli medeniýetimizi, sungatymyzy
ösdürmek, döwrebap, kämil eserleri döretmek ugrunda ähli zerur şertler
döredilýär. Hormatly Prezidentimiz türkmen halkynyň gadymy taryhyny we
medeni mirasyny içgin öwrenmeklige uly ähmiýet berýär. Bularyň ählisiniň ýaş
nesilleri watançylyk ruhunda terbiýelemekde bahasyna ýetip bolmajak uly
ähmiýeti bardyr.
Dabara gatnaşyjylar döredilýän ähli mümkinçilikler üçin Türkmen halkynyň
Milli Lideri Gahryman Arkadagymyza, Arkadagly Gahryman Serdarymyza alkyş
hem-de hoşallyk sözlerini aýtdylar.
Begenç MAKSADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.