SUW DIPLOMATIÝASY BOÝUNÇA MÖWSÜMLEÝIN OKUWLAR TAMAMLANDY
Häzirki zaman dünýäsinde parahatçylygy, durnuklylygy we ösüşi üpjün etmek, esasan, suw çeşmeleri bilen baglanşykly meseleleriň oýlanyşykly çözülmegine baglydyr. Döwlet Baştutanymyzyň belleýşi ýaly, dünýäniň ähli halklary üçin suw durmuşyň we bolçulygyň mukaddes çeşmesidir. Mälim bolşy ýaly, suw diplomatiýasy – Türkmenistanyň daşary syýasatynyň esasy ugurlarynyň biri bolup durýar.
Gahryman Arkadagymyzyň başlangyjy esasynda Türkmenistanyň Daşary işler ministrliginiň Halkara gatnaşyklary institutynyň Türkmenistanyň diplomatiýasynyň möhüm ugurlary boýunça okuw merkezinde degişli fakultatiw okuwlar ýokary derejede geçirildi.
Bu okuwlar ýörite tassyklanan meýilnamalar esasynda alnyp barlyp, okuw sapaklaryna halkara guramalarynyň wekilleri, ýurdumyzyň ministrlikleriniň, pudak edaralarynyň we ylmy-barlag edaralarynyň hünärmenleri, ýokary okuw mekdepleriniň mugallymlary, institutymyzyň magistleri gatnaşyp, işjeň çykyş etdiler. Bu bolsa okuw merkeziniň diňleýjilerine suw diplomatiýasy boýunça ýöriteleşdirilen nazary bilimleri almaklyga hem-de geljekki diplomatlar hökmünde hünär endiklerini artdyrmaklyga giň şertleri döretdi.
Türkmenistanyň diplomatiýasynyň möhüm ugurlary boýunça okuw merkeziniň möwsümleýin okuwlarynyň tamamlanmagy mynasybetli oňa gatnaşyjylara degişli Şahadatnamalar gowşuryldy. Bu bolsa talyp ýaşlaryň diplomatiýanyň we daşary syýasatyň möhüm ugurlary boýunça bilimlerini artdyrmagyna ýakyndan ýardam etdi.
Kakamyrat REJEPGELDIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.