STRATEGIK BARLAGLAR BOÝUNÇA YLMY MERKEZIŇ NOBATDAKY DUŞUŞYGY
2022-nji ýylyň 31-nji maýynda Türkmenistanyň Daşary işler ministrliginiň Halkara gatnaşyklary institutynda Strategik barlaglar boýunça ylmy merkez bilen Gazagystan Respublikasynyň Daşary işler ministrliginiň ýanyndaky Daşary syýasaty öwreniş institutynyň arasynda göni wideoaragatnaşyk arkaly tanyşlyk duşuşygy geçirildi. Oňa merkezleriň wekilleri gatnaşdylar.
Duşuşygyň barşynda Türkmenistanyň Daşary işler ministrliginiň halkara gatnaşyklary institutynyň düzümindäki Strategik barlaglar boýunça ylmy merkeziniň başlygy Şiri Şiriýew çykyş edip, merkeziň esasy wezipesiniň Türkmenistanyň daşary syýasatynda netijeli hyzmatdaşlygy amala aşyrmaga, şeýle hem ylmy-seljeriş we maslahat beriş çärelerini guramaga gönükdirilendigini nygtap geçdi. Gazagystan Respublikasynyň Daşary işler ministrliginiň ýanyndaky Daşary syýasaty öwreniş institutynyň başlygy Bolat Nurgalyýew öz çykyşynda iki ýurduň arasyndaky gatnaşyklary ösdürmek üçin durmuşa geçirilýän maksatlaryň we wezipeleriň meňzeşligini göz öňünde tutup, özara gyzyklanma bildirýän ugurlarda hyzmatdaşlyk etmegiň möhümdigini belledi.
Duşuşygyň ahyrynda taraplar institutlaryň arasynda ylmy materiallaryň alyş-çalşygyny ýola goýmak, resmi web sahypalarynda ylalaşylan maglumatlary ýerleşdirmek, özara gyzyklanma bildirýän mowzuklarda bilelikdäki ylmy konferensiýalary we tegelek stollary geçirmek ýaly meseleleriň üstünde durup geçdiler.
Aýlar ATAJYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.