SANLY ŽURNALISTIKA BARADA TÄSIRLI TEJRIBELIK OKUWY
2024-nji ýylyň 8-10-njy maýy aralygynda Ýewropada Howpsuzlyk we Hyzmatdaşlyk Guramasynyň (OSCE) Aşgabatdaky Merkeziniň guramagynda guramanyň Türkmenistandaky wekilhanasynyň binasynda «Sanly metbugat üçin täzelikleri we makalalary ýazmak boýunça» tejribelik okuwy geçirildi. Ýokary derejede guralan okuw sapagyna Türkmenistanyň Magtymguly adyndaky Türkmen döwlet uniwersitetiniň, Türkmenistanyň Daşary işler ministrliginiň Halkara gatnaşyklary institutynyň, Halkara ynsanperwer ylymlary we ösüş uniwersitetiniň, Türkmen döwlet bedenterbiýe we sport institutynyň žurnalistika hünäri boýunça mugallymlary hem-de ýurdumyzyň köpçülikleýin habar beriş serişdeleriniň žurnlistleri gatnaşdylar. Okuw sapagyny Beýik Britaniýaly jenap Marek Bekerman, belarusiýaly jenap Witaliý Rugaýn ýaly halkara bilermenler alyp bardylar.
Okuw seminarynyň esasy maksady sanly žurnalistika ugry boýunça milli hünärmenleriň ukyplaryny artdyrmaga, sanly KHBS-ler üçin maglumat we tematiki materillary taýýarlamagyň iň täze usullaryny öwretmäge gönükdirildi. Sapagyň dowamynda halkara bilermenler sanly žurnalistikanyň bu günki ýeten derejesi, mümkinçilikleri barada dünýä tejribesiniň mysalynda giňişleýin düşünje berdiler.
Jemile PÜRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti
kafedrasynyň uly mugallymy.