«Sahypalarda gizlenen — dünýäniň syry» atly kitap sergisi
2026-njy ýylyň 30-31-nji oktýabrynda Türkmenistanyň Daşary işler ministrliginiň Halkara gatnaşyklary institutynda bu ýokary okuw mekdebiň guramagynda «Sahypalarda gizlenen — dünýäniň syry» atly kitap sergisi geçirildi. Oňa türkmen diplomatiýasynyň milli mekdebiniň we ýurdumyzyň ýokary okuw mekdepleriniň professor-mugallymlary, talyplary hem-de magistrlary gatnaşdylar.
Çäräniň iki gününde hem sagat 15:00-dan 17:00-a çenli dowam eden gözden geçirişiň dowamynda Gahryman Arkadagymyzyň, Arkadagly Gahryman Serdarymyzyň hem-de dünýäniň dürli dillerinde çykarylan kitaplar sergilenildi.
Milli Liderimiziň «Kitap dünýäni açýar. Aslynda, dünýä kitaba öwrülmek üçin ýaşaýar. Kitaplar asyrlaryň taryhyny, durmuşyny ruhuny özüne siňdirýändigi bilen şöhratlanýar. Çünki kitap döwrüň waspçysy, paýhas ummany» diýen sözlerinden ugur alyp guralan bu çäre, özboluşlylygy bilen tapawutlanyp, talyplaryň kitaba bolan höwesini artdyrmaga ýardam etdi. Şeýle hem ýaşlar dürli ugurlara degişli bolan kitaplar barada gyzykly maglumatlar bilen tanyşmaga mümkinçilik aldylar.
Serginiň ahyrynda oňa gatnaşyjylar Gahryman Arkadagymyza, Arkadagly Gahryman Serdarymyza türkmen ýaşlarynyň dünýa derejesinde ylymda-bilimde döredip berilýän şertler üçin tüýs ýürekden sagbolsun aýtdylar.
Gurbangül BAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 3-nji ýyl talyby