PARAHATÇYLYK WE YNANYŞMAK DÜŞÜNJELERINE BAGYŞLANAN YLMY-DÖREDIJILIK MASLAHATY GEÇIRILDI
2025-nji ýylyň 25-nji noýabrynda Türkmenistanyň Daşary işler ministrliginiň Halkara gatnaşyklary institutynda «Parahatçylyk we ynanyşmak düşünjeleriniň taryhy köklerinde dilşynaslyk başarnygynyň kemala gelmegi» atly ylmy-döredijilik maslahaty geçirildi. Institutyň mugallymlarynyň we talyplarynyň gatnaşmagynda geçirilen bu çäre, esasan, dilşynaslyk ylmynyň ösüşine, beýik akyldar şahyr Magtymguly Pyragynyň döredijilik älemine, şeýle-de daşary ýurt dillerini öwrenmegiň ähmiýetine bagyşlandy.
Maslahatda Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň uly mugallymy Maýa Atajanowa, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň uly ylmy işgäri Gülälek Hangeldiýewa, şeýle hem Magtymguly adyndaky Türkmen döwlet uniwersitetiniň Iňlis diliniň stilistikasy we grammatikasy kafedrasynyň uly mugallymy Körpe Atanyýazowa çykyş etdiler.
Ylmy-döredijilik maslahatynyň dowamynda çykyş eden myhmanlar parahatçylyk we ynanyşmak düşünjeleriniň türkmen halkynyň taryhynda we edebi mirasynda tutýan orny barada giňişleýin gürrüň berdiler. Hususan-da, Magtymguly Pyragynyň şygryýetinde öňe sürülýän parahatçylyk söýüjilik ýörelgeleriniň dil serişdeleri arkaly çeper beýan edilişi dogrusynda gymmatly pikirleriň üstünde durup geçdiler.
Çäräniň esasy üns merkezinde duran meseleleriň biri hem ene dilimiz bolan türkmen dilini gorap saklamak bilen bir hatarda, daşary ýurt dillerini kämil öwrenmegiň zerurlygy boldy. Häzirki zaman halkara gatnaşyklarynda möhüm orun tutýan terjimeçilik işiniň inçe syrlary we onuň halklary ýakynlaşdyrmakdaky hyzmaty barada hem bellenilip geçildi.
Institutyň talyplary üçin uly ähmiýete eýe bolan bu maslahat, ýaşlaryň ylmy-döredijilik gözleglerine badalga bolup, olaryň dilşynaslyk babatdaky bilimlerini has-da çuňlaşdyrmaga ýardam etdi.
Hemragylyç NURMÄMMEDOW,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy.