«Parahatçylygyň ýaş çaparlary»: IV möwsümiň IV saýlama oýny geçirildi
2025-nji ýylyň 15-nji ýanwarynda Türkmenistanyň Daşary işler ministrliginiň Halkara gatnaşyklary institutynda «Parahatçylygyň ýaş çaparlary» atly akyl-paýhas bäsleşiginiň «Bitarap Türkmenistanyň parahatçylygy dörediji diplomatiýasy: netijeli hyzmatdaşlygyň we durnukly ösüşiň ygtybarly guraly» atly umumy şygar astynda geçirilýän IV möwsüminiň IV saýlama oýny geçirildi. Akyl-paýhas bäsleşiginiň nobatdaky saýlama oýny «Türkmenistanyň medeni diplomatiýasy: milli we umumadamzat mirasynyň birleşdiriji güýji hereketde» atly tema bagyşlanyldy.
«Parahatçylygyň ýaş çaparlary» atly akyl-paýhas bäsleşiginiň IV möwsüminiň IV saýlama oýnuna Aşgabat şäheriniň 39-njy orta mekdebiniň 12-nji synp okuwçysy Merjen Röwşenowa, Aşgabat şäheriniň daşary ýurt dillerini çuňlaşdyryp öwredýän ýöriteleşdirilen 90-njy orta mekdebiniň 12-nji synp okuwçysy Gülşat Meredowa, Arkadag şäheriniň iňlis diline ýöriteleşdirilen 4-nji orta mekdebiniň 11-nji synp okuwçysy Jemal Hallyýewa, Balkan welaýatynyň Türkmenbaşy şäheriniň takyk ugurly derslerine ýöriteleşdirilen 10-njy orta mekdebiniň 12-nji synp okuwçysy Rejepguly Maşadow, Mary welaýatynyň Ýolöten etrabynyň 40-njy orta mekdebiniň 12-nji synp okuwçysy Agamergen Myradow, Mary welaýatynyň Murgap etrabynyň 36-njy orta mekdebiniň 11-nji synp okuwçysy Maral Pälwanowa, Daşoguz welaýatynyň Daşoguz şäheriniň iňlis dili, himiýa we biologiýa derslerini çuňlaşdyrylyp öwredilýän 26-njy orta mekdebiniň 11-nji synp okuwçysy Saparmyrat Gulmedow, Lebap welaýatynyň Türkmenabat şäheriniň iňlis dili, fizika we matematika derslerini çuňlaşdyrylyp öwredilýän ýöriteleşdirilen 41-nji orta mekdebiniň 11-nji synp okuwçysy Nurmuhammet Batyrow dagy gatnaşdylar.
Akyl-paýhas bäsleşiginiň IV möwsüminiň IV saýlama oýnuna «Pähimdarlar geňeşiniň» agzalary hökmünde Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň uly mugallymy, filosofiýa ylymlarynyň kandidaty Begenç Karaýew, Türkmen döwlet medeniýet institutynyň Jemgyýeti öwreniş ylymlary kafedrasynyň uly mugallymy Güljeren Karaýewa, Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary kafedrasynyň uly mugallymy Perhat Çaryýew dagy adalatly eminlik etdiler.
Gyzgalaňly geçen bäsleşigiň netijelerine laýyklykda, Aşgabat şäheriniň daşary ýurt dillerini çuňlaşdyryp öwredýän ýöriteleşdirilen 90-njy orta mekdebiniň 12-nji synp okuwçysy Gülşat Meredowa we Arkadag şäheriniň iňlis diline ýöriteleşdirilen 4-nji orta mekdebiniň 11-nji synp okuwçysy Jemal Hallyýewa ýeňiş gazanmagy başardylar.
Akyl-paýhas bäsleşiginiň IV möwsüminiň IV saýlama oýnuna Türkmenistanyň Magtymguly adyndaky Ýaşlar guramasynyň Merkezi Geňeşi we Türkmenistanyň Milli ýaý atyjylyk federasiýasy hemaýatkärlik etdiler. Ýeňijiler we bäsleşige gatnaşyjylar ýadygärlik sowgatlar bilen sylaglandylar. Şeýle-de olara institutymyzyň Hormat hatlary gowşuryldy.
«Parahatçylygyň ýaş çaparlary» atly akyl-paýhas bäsleşiginiň IV möwsüminiň IV saýlama oýny Türkmenistanyň Telewideniýe, radiogepleşikler we kinematografiýa baradaky döwlet komitetiniň «Miras» teleradioýaýlymy bilen Türkmenistanyň Daşary işler ministrliginiň Halkara gatnaşyklary institutynyň okuw studiýasy bilen bilelikde ýazgy edildi. Bäsleşik ýakyn günlerde «Miras» teleýaýlymynda tomaşaçylara ýetiriler.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby,
«Parahatçylygyň ýaş çaparlary» atly akyl-paýhas bäsleşiginiň
I we II möwsümleriniň ýeňijisi.