«PARAHATÇYLYGYŇ ÝAŞ ÇAPARLARY»: III MÖWSÜMIŇ VI SAÝLAMA OÝNY GEÇIRILDI
2024-nji ýylyň 14-nji fewralynda Türkmenistanyň Daşary işler ministrliginiň Halkara gatnaşyklary institutynda «Parahatçylygyň ýaş çaparlary» atly akyl-paýhas bäsleşiginiň III möwsüminiň VI saýlama oýny geçirildi. «Beýik Magtymguly Pyragynyň taglymaty — umumadamzat gymmatlyklarynyň milli şamçyragy» atly umumy şygar astynda geçirilýän III möwsümiň VI saýlama oýny «Ahmet şa Dürrany. Dürranylar döwletiniň daşary syýasaty we halkara gatnaşyklary» diýen tema boýunça geçirildi.
«Parahatçylygyň ýaş çaparlary» atly akyl-paýhas bäsleşiginiň III möwsüminiň VI saýlama oýnuna Mary welaýatynyň Sakarçäge etrabynyň Şatlyk şäherindäki takyk we tebigy ugurlardan ýöriteleşdirilen 43-nji orta mekdebiniň 11-nji synp okuwçysy Serdar Baýmuhammedow, şol mekdebiň 11-nji synp okuwçysy Perhat Orazmyradow, Aşgabat şäheriniň dil derslerini çuňlaşdyryp öwredýän 87-nji ýöriteleşdirilen orta mekdebiniň 11-nji synp okuwçysy Kümüş Täçmuhammedowa, Ahal welaýatynyň Sarahs etrabynyň 10-njy orta mekdebiniň 11-nji synp okuwçysy Döwletgeldi Parahadow, Aşgabat şäherindäki Saparmyrat Türkmenbaşy adyndaky ýöriteleşdirilen umumy bilim berýän mekdep internatynyň 11-nji synp okuwçysy Merjen Öwezmyradowa, Balkan welaýatynyň Balkanabat şäheriniň 12-nji orta mekdebiniň 11-nji synp okuwçysy Resul Nazarow, Balkan welaýatynyň 14-nji orta mekdebiniň 11-nji synp okuwçysy Bike Annaýewa, hem-de Aşgabat şäherininiň 76-njy ýöriteleşdirilen orta mekdebiniň 11-nji synp okuwçysy Ilaman Karaýew dagy gatnaşdylar.
Akyl-paýhas bäsleşiginiň III möwsüminiň VI saýlama oýnuna «Pähimdarlar geňeşiniň» agzalary hökmünde Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň uly mugallymy, filosofiýa ylymlarynyň kandidaty Begenç Karaýew, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň Türkmen taryhynyň golýazma çeşmeleri bölüminiň müdiri Geldimyrat Muhammedow, Magtymguly adyndaky Türkmen döwlet uniwersitetiniň Arheologiýa we Etnologiýa kafedrasynyň müdiri, taryh ylymlarynyň kandidaty Mähri Perdeliýewa dagy adalatly eminlik etdiler.
Bäsleşik örän çekeleşikli we gyzykly ýagdaýda geçip, onuň netijelerine laýyklykda, sowallara dürs jogap bermekde has tapawutlanan Mary welaýatynyň Sakarçäge etrabynyň Şatlyk şäherindäki takyk we tebigy ugurlardan ýöriteleşdirilen 43-nji orta mekdebiniň 11-nji synp okuwçysy Perhat Orazmyradow, Ahal welaýatynyň Sarahs etrabynyň 10-njy orta mekdebiniň 11-nji synp okuwçysy Döwletgeldi Parahadow dagy ýeňiji boldular. Ýeňijilere we bäsleşige gatnaşyjylara institutyň adyndan Hormat hatlary, Magtymgulynyň 300 yyllygyna bagyşlanyp institutymyz tarapyndan taýýarlanan «Magtymguly Pyragynyň umumy adamzat ähmiýetli parahatçylyk taglymaty we häzirki zamanyň möhüm meseleleri» atly ylmy makalalar ýygyndysy, şeýle-de hemaýatkärler tarapyndan gymmat bahaly ýadygärlik sowgatlary bilen sylaglandylar.
Bäsleşigiň III möwsüminiň VI saýlama oýnuna Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar instituty, Türkmenistanyň Magtymguly adyndaky Ýaşlar guramasynyň Merkezi Geňeşi, Türkmenistanyň Milli ýaý atyjylyk federasiýasy, Türkmenistanyň Senagatçylar we telekeçiler birleşmesi, «Abadan haly» açyk görnüşli paýdarlar jemgyýeti, «Aýdyň gijeler» hojalyk jemgyýeti, «Ýedi dogan» hususy kärhanasy, «Muhammet Balkan» hojalyk jemgyýeti, «Düwmejik» hususy kärhanasy, «Ak menzil» hususy kärhanasy hemaýatkärlik etdiler.
«Parahatçylygyň ýaş çaparlary» atly akyl-paýhas bäsleşiginiň III möwsüminiň VI saýlama oýny Türkmenistanyň Telewideniýe, radiogepleşikler we kinematografiýa baradaky döwlet komitetiniň «Miras» teleradioýaýlymy bilen Türkmenistanyň Daşary işler ministrliginiň Halkara gatnaşyklary institutynyň okuw studiýasy tarapyndan bilelikde ýazgy edildi. Bäsleşik ýakyn günlerde «Miras» teleýaýlymynda tomaşaçylara ýetiriler.
Orazjemal Çaryýarowa,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby,
«Parahatçylygyň ýaş çaparlary» atly
akyl-paýhas bäsleşiginiň
I möwsüminiň VII oýnunyň ýeňijisi.
Bu barada şu ýerde hem okap bilersiňiz: