Parahatçylygyň ýaş çaparlary: III möwsümiň I ýarym final oýny geçirildi
2024-nji ýylyň 17-nji aprelinde Türkmenistanyň Daşary işler ministrliginiň Halkara gatnaşyklary institutynyň Ýaş diplomatlaryň mekdebiniň guramagynda «Parahatçylygyň ýaş çaparlary» atly akyl-paýhas bäsleşiginiň 2023-2024-nji okuw ýylyndaky «Magtymguly Pyragynyň beýik taglymaty – umumadamzat gymmatlyklarynyň milli şamçyragy» atly umumy şygar astynda geçirilýän III möwsüminiň I ýarym final oýny geçirildi. I ýarym final oýnunyň temasy möwsümiň umumy şygaryna bagyşlanyldy. Akyl-paýhas bäsleşiginiň III möwsüminiň I ýarym final oýnuna bäsleşigiň saýlama oýunlarynda tapawutlanyp ýeňiş gazanmagy başaran Aşgabat şäheriniň 108-nji orta mekdebiniň 11-nji synp okuwçysy Güljemal Orazowa, Balkan welaýatynyň Balkanabat şäheriniň iňlis dili, fizika we matematika derslerine ýöriteleşdirilen 22-nji orta mekdebiniň 11-nji synp okuwçysy Müsür Gutlymyradowa, Mary welaýatynyň Ýolöten etrabynyň 40-njy orta mekdebiniň 11-nji synp okuwçysy Muhammetmyrat Ýakubow, Mary welaýatynyň Sakarçäge etrabyndaky takyk we tebigy ugurlardan ýöriteleşdirilen 43-nji orta mekdebiniň 11-nji synp okuwçysy Perhat Orazmyradow, Lebap welaýatynyň Kerki etrabynyň 35-nji orta mekdebiniň 11-nji synp okuwçysy Gülaýym Bakyýewa, Ahal welaýatynyň Sarahs etrabynyň 10-njy orta mekdebiniň 11-nji synp okuwçysy Döwletgeldi Parahadow, Aşgabat şäherindäki Saparmyrat Türkmenbaşy adyndaky ýöriteleşdirilen umumy bilim berýän mekdep-internatynyň 10-njy synp okuwçysy Nurgözel Gutlyýewa, Aşgabat şäherindäki 86-njy ýöriteleşdirilen orta mekdebiniň 11-nji synp okuwçysy Aýmyrat Kakaýew dagy gatnaşdylar.
Akyl-paýhas bäsleşiginiň III möwsüminiň I ýarym final oýnuna «Pähimdarlar geňeşiniň» agzalary hökmünde Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň uly mugallymy, filosofiýa ylymlarynyň kandidaty Begenç Karaýew, Seýitnazar Seýdi adyndaky Türkmen döwlet mugallymçylyk institutynyň Rus dili we edebiýaty, olary okatmagyň usulyýeti kafedrasynyň uly mugallymy, filologiýa ylymlarynyň kandidaty Agamämmet Ýazmyradow, Magtymguly adyndaky Türkmen döwlet uniwersitetiniň Türkmenistanyň taryhy kafedrasynyň uly mugallymy Döwlet Kössekow dagy adalatly eminlik etdiler.
Gyzgalaňly hem-de çekeleşikli geçen bäsleşigiň netijelerine laýyklykda, Lebap welaýatynyň Kerki etrabynyň 35-nji orta mekdebiniň 11-nji synp okuwçysy Gülaýym Bakyýewa, Aşgabat şäherindäki 86-njy ýöriteleşdirilen orta mekdebiniň 11-nji synp okuwçysy Aýmyrat Kakaýew, Aşgabat şäheriniň 108-nji orta mekdebiniň 11-nji synp okuwçysy Güljemal Orazowa, Balkan welaýatynyň Balkanabat şäheriniň iňlis dili, fizika we matematika derslerine ýöriteleşdirilen 22-nji orta mekdebiniň 11-nji synp okuwçysy Müsür Gutlymyradowa I ýarym final oýnunyň ýeňijileri diýlip yglan edildi. Ýeňijiler bäsleşigiň jemleýji final oýnuna gatnaşmaga hukuk gazandylar. Ýarym final oýnuna gatnaşan mekdep okuwçylarynyň berlen sowallara ýiti zehinlilik, ugurtapyjylyk we akyl-paýhas bilen jogap bermekleri olaryň bäsleşige gowy taýýarlykly gelendikleriniň aýdyň subutnamasy boldy.
Akyl-paýhas bäsleşiginiň I ýarym final oýnuna Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar instituty, Türkmenistanyň Magtymguly adyndaky Ýaşlar guramasynyň Merkezi Geňeşi, Türkmenistanyň Milli ýaý atyjylyk federasiýasy, Türkmenistanyň Senagatçylar we telekeçiler birleşmesi, «Abadan haly» açyk görnüşli paýdarlar jemgyýeti, «Aýdyň gijeler» hojalyk jemgyýeti, «Täç hil» hususy kärhanasy, «Ýedi dogan» hususy kärhanasy, «Muhammet Balkan» hojalyk jemgyýeti, «Düwmejik» hususy kärhanasy, «Ak menzil» hususy kärhanasy, «Şerbetli Ak Gar» hojalyk jemgyýeti hemaýatkärlik etdiler. Ýeňijiler we bäsleşige gatnaşyjylar hemaýatkärler tarapyndan taýýarlanylan gymmat bahaly ýadygärlik sowgatlary hem-de Türkmenistanyň Daşary işler ministrliginiň Halkara gatnaşyklary institutynyň Hormat hatlary bilen sylaglandylar. «Parahatçylygyň ýaş çaparlary» atly akyl-paýhas bäsleşiginiň II möwsüminiň I ýarym final oýny «Miras» teleýaýlymy hem-de Türkmenistanyň Daşary işler ministrliginiň Halkara gatnaşyklary institutynyň okuw studiýasy tarapyndan bilelikde ýazgy edildi. Bäsleşik ýakyn günlerde «Miras» teleýaýlymynda tomaşaçylara ýetiriler. «Parahatçylygyň ýaş çaparlary» atly akyl-paýhas bäsleşiginiň III möwsüminiň II ýarym final oýny 2024-nji ýylyň 19-njy aprelinde geçiriler.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby,
«Parahatçylygyň ýaş çaparlary» atly akyl – paýhas bäsleşiginiň
I we II möwsümleriniň ýeňijisi.