«PARAHATÇYLYGYŇ ÝAŞ ÇAPARLARY» AKYL-PAÝHAS BÄSLEŞIGINE ISLENDIK WAGT, ISLENDIK ÝERDE TOMAŞA EDIŇ!
Türkmen diplomatiýasynyň ýokary mekdebinde geçirmek asylly däbe öwrülen «Parahatçylygyň ýaş çaparlary» atly akyl-paýhas bäsleşigi bu günki günde mekdep partasynda bilim alýan okuwçylaryň arasynda uly gyzyklanma döredýär. Bu bäsleşik Gahryman Arkadagymyzyň ýörite karary esasynda 2021-nji ýylda açylan Ýaş diplomatlaryň mekdebi tarapyndan başy başlanyp, bu zehin bäsleşiginiň esasy maksady Gahryman Arkadagymyzyň, Arkadagly Gahryman Serdarymyzyň alyp barýan içeri we daşary syýasatyna wepaly hem-de zehinli, geljekki ykbalyny diplomatiýa hünärine baglamak isleýän ýaşlary ýüze çykarmakdan ybaratdyr. «Parahatçylygyň ýaş çaparlary» atly akyl-paýhas bäsleşigi mekdep okuwçylaryna milli diplomatiýamyzyň taryhyny içgin öwrenmäge, hünär saýlamaga ýakyndan ýardam edýär. Ýaş zehinleriň bäsleşýän meýdançasy bolan akyl-paýhas bäsleşiginiň geçirilýän «Türkmeniň Ak öýi» häzirki wagta çenli 3 möwsüme, oýunlaryň 29-syna, mekdep okuwçylaryň bolsa 192-siniň bäsleşen pursatlaryna şaýatlyk etdi. Aýratyn bellemeli zatlaryň biri hem, häzirki wagtda I we II möwsümleriň netijeleri boýunça 20 sany ýaş çapar özleriniň saýlap alan hünärleri boýunça Türkmenistanyň Daşary işler ministrliginiň Halkara gatnaşyklary institutynda bilim alýar. Şeýle hem bäsleşige gatnaşan ýaş çaparlaryň ýurdumyzyň baýry ýokary okuw jaýlarynda, Türkiýe Respublikasynda, Amerikanyň Birleşen Ştatlarynda, Hytaý Halk Respublikasynda, Russiýa Federasiýasynda, Gazagystan Respublikasynda ýerleşýän ýokary okuw mekdeplerinde okap, bilim alýandyklary bäsleşigiň esasy maksadynyň kämil durmuşa geçirilýändigini aýdyň subut edýär.
Bäsleşige gatnaşmaga isleg bildirýän mekdep okuwçylarynyň sanynyň ýyl-ýyldan artmagy türkmen diplomatiýasynyň taryhyny öwrenmäge gyzyklanma bildirýän ýaş zehinleriň hem sanynyň has-da köpelýändigini görkezýär. Häzirki wagtda bäsleşigiň guramaçylyk topary 2024-2025-nji okuw ýyly üçin badalga berlen IV möwsüme gatnaşmaga isleg bildirýän mekdep okuwçylaryny hasaba almaga başlady.
«Parahatçylygyň ýaş çaparlary» atly akyl-paýhas bäsleşigi häzirki wagta çenli yzygiderli teleýaýlyma berlip, telegörüjileriň sabyrsyzlyk bilen garaşýan akyl-paýhas oýnuna öwrüldi. Bäsleşigimizi gaýtadan tomaşa etmek isleýän telegörüjilerimiz, bäsleşige gatnaşan ýaş çaparlarymyz, şeýle-de geljekde gatnaşmaga isleg bildirýän, bäsleşigimiz bilen ýakyndan gyzyklanýan muşdaklarymyz üçin «Belet Film» platformasynyň täzelenen TV Show bölüminde bäsleşigiň ähli oýunlaryny islendik wagt tomaşa etmäge mümkinçilik döredildi. Sizi «Parahatçylygyň ýaş çaparlary» atly akyl-paýhas bäsleşigimiziň oýunlaryna tomaşa etmäge çagyrýarys!
Şasenem MEÝLISOWA,
Türkmenistanyň Daşary işler ministrliginiň
Halkara gatnaşyklary institutynyň 2-nji ýyl talyby.