Okuw-usuly maslahat geçirildi
2025-nji ýylyň 30-njy oktýabrynda Türkmenistanyň Daşary işler ministrliginiň Halkara gatnaşyklary institutynda halkara ylmy-tehniki maglumat çeşmeleri, olarda indekslenýän žurnallarda makalalary çap etmek, dürli bibliometrik görkezijiler bilen bagly düşünjeleri artdyrmak boýunça onlaýn okuw-usuly maslahat geçirildi. Oňa institutyň Žurnalistikanyň nazaryýeti we amalyýeti kafedrasynyň professor-mugallymlary işjeň gatnaşdylar.
Okuw-usuly maslahatda Türkmen döwlet binagärlik-gurluşyk institutynyň Önümçiligi awtomatlaşdyrmak kafedrasynyň dosenti Ahmet Penjiýew Scopus we Web of Science maglumat çeşmeleri, Akademiýa Google we Microsoft akademik düşünjeleri (Google Scholar, Microsoft Academic) barada çykyş etdi. Onda jikme-jik salgylanmalara hem-de tejribede gazanylan görkezijilere esaslanýan prezentasiýa görkezildi. Bu bolsa maslahatyň täsirliligini artdyryp, mugallymlara şu ugurda baý tejribe toplamaga mümkinçilik döretdi.
Okuw-usuly maslahatyň ahyrynda mugallymlar özlerini gyzyklandyrýan sowallar bilen ýüzlendiler. Sorag-jogap alyşmak arkaly geçirilen onlaýn maslahat örän täsirli boldy. Onuň ahyrynda okamaga-öwrenmäge, ýaşlara bilim bermekde ylmy esasda çemeleşmäge döredilip berilýän giň mümkinçilikler üçin Gahryman Arkadagymyza, Arkadagly Gahryman Serdarymyza sagbolsun aýdyldy.
Aýnabat NAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti kafedrasynyň mugallymy.