ÖKDELER ÖŇE SAÝLANDY
2025-nji ýylyň 18-nji martynda Türkmenistanyň Daşary işler ministrliginiň Halkara gatnaşyklary institutynda Ýaş diplomatlaryň mekdebiniň agzalarynyň arasynda Halkara Nowruz güni mynasybetli guralan «Biziň ýerler — behişt ýerler, bu ýerler...» atly fotosurat bäsleşiginiň ýeňijilerini sylaglamak dabarasy geçirildi. Bu bäsleşik Žurnalistikanyň nazaryýeti we amalyýeti kafedrasynyň «Ýaş žurnalistler» ylmy-döredijilik gurnagy hem-de Türkmenistanyň Magtymguly adyndaky Ýaşlar guramasynyň Bagtyýarlyk etrap Geňeşiniň bilelikde gurnamagynda geçirildi. Oňa türkmen diplomatiýasynyň milli mekdebiniň mugallymlary, talyplary we türkmen tebigatyny, Diýarymyzyň gözel künjeklerini fotosuratlarda şöhlelendirmekde tapawutlanan ýaşlar gatnaşdylar. Bäsleşigiň maksady hormatly Prezidentimiziň alyp barýan parahatçylyk dörediji daşary syýasy başlangyçlarynyň netijesinde Bitarap Türkmenistanyň ýeten ýokary halkara abraýyny, owadan ýerlerini, ýurdumyzyň durmuş-ykdysady depginini fotosuratlarda, şekillerde teswirlemek hem-de ýokary okuw mekdeplerinde geljekde žurnalistika we beýleki hünärlerde okajak okuwçylaryň arasynda fotožurnalistika bolan garaýyşlary ösdürmek bilen bir hatarda, tebigata, ýurdumyza hormat söýgüni artdyrmakdan ybaratdyr. Bäsleşigiň şertlerine laýyklykda döwürleýin neşirleriň belli fotohabarçylaryndan düzülen eminler tarapyndan ýeňijiler seçilip saýlandy. Netijede I orna Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 12-nji synp okuwçysy Oguljennet Amanowa, II orna Balkan welaýatynyň Etrek etrabyndaky 8-nji orta mekdebiň 12-nji synp okuwçysy Resulnazar Taýtyrow, III orna Arkadag şäherindäki 2-nji orta mekdebiň 12-nji synp okuwçysy Begmuhammet Hanmämmedow dagy diploma, şeýle-de Daşoguz welaýatynyň Şabat etrabyndaky 16-njy orta mekdebiň okuwçysy Şadiýa Muzaffarowa, Balkan welaýatynyň Magtymguly etrabyndaky daşary ýurt dilleri çuňlaşdyrylyp öwredilýän umumybilim berýän ýöriteleşdirilen 19-njy orta mekdebiň 12-nji synp okuwçysy Ogulgerek Goçmyradowa, Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 11-nji synp okuwçysy Jeýhun Hojageldiýew, Mary welaýatynyň Ýolöten etrabyndaky 28-nji orta mekdebiň 9-njy synp okuwçysy Hojamyrat Aganiýazow, Daşoguz welaýatynyň Daşoguz şäherindäki daşary ýurt dillerine ýöriteleşdirilen 1-nji orta mekdebiň 8-nji synp okuwçysy Ahmet Babajanow dagy bolsa Hormat haty bilen sylaglanyldy. I, II, III orunlara we höweslendiriji baýraklara eýe bolanlara Türkmenistanyň Magtymguly adyndaky Ýaşlar guramasynyň Bagtyýarlyk etrap Geňeşiniň adyndan gymmat bahaly sowgatlar gowşuryldy.
Şeýle hem bäsleşige gatnaşan mekdep okuwçylary hünäre ugrukdyrmak maksady bilen, institutyň Halkara žurnalistikasy fakultetinde hereket edýän okuw studiýasynyň, “Žurnalistiň sesi” radioýaýlymy, “Ýaş diplomatyň sesi” elektron gazetiniň döredijilik işi bilen tanyşdyryldy. Şeýle gezelenç okuwçylarda uly täsir galdyrdy.
Selbi BATYROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
žurnalistikasy fakultetiniň I ýyl talyby.