NUSAÝ GALASYNYŇ TARYHY ÝADYGÄRLIGINE GEZELENÇ
2026-njy ýylyň 7-nji oktýabrynda Türkmenistanyň Daşary işler ministrliginiň Halkara gatnaşyklary institutynyň “Parahatçylyk medeniýeti” ÝUNESKO klubynyň, Ýaş alymlar geňeşiniň, “Paýhas we parasat” hem-de “Ýaş žurnalistler” ylmy-döredijilik gurnaklarynyň we Ýaş diplomatlaryň mekdebiniň bilelikde gurnamagynda “Nusaý” döwlet taryhy-medeni goraghanasyna gezelenç gurnaldy.
Gezelenjiň dowamynda hünärmenler 2007-nji ýylda ÝUNESKO-nyň Bütindünýä medeni mirasynyň sanawyna girizilen “Nusaý” döwlet taryhy-medeni goraghanasynyň taryhy ähmiýeti barada gyzykly maglumatlary gürrüň berdi.
Mälim bolşy ýaly, taryhy kitaplaryň sahypalaryndan orun alan Täze we Köne Nusaý galalary häzirki döwürde özüniň meşhurlygyny barha artdyrýar. Gözbaşyny has irki, has takygy antiki döwürlerden alyp gaýdýan Nusaý häzirki Aşgabat şäheriniň eteginde ýerleşip, gadymy döwürde Parfiýa döwletiniň paýtagty bolupdyr.
Gezelenjiň dowamynda hünärmeniň M.E.Massonyň ýolbaşçylygyndaky ekspedisiýalar tarapyndan geçirilen gazuw-agtaryş işleriniň netijesinde toplanan hakyky subutnamalaryň we arheologik tapyndylaryň Parfiýa döwletiniň paýtagtynyň – Köne Nusaýyň binalarynyň nähili derejede ajaýypdygyny bütin dünýä görkezendigi, bu alymyň sütünli zalyň, ybadathanalaryň we berkitmeleriň harabalyklaryny, arameý ýazuwynda parfiýa dilinde ýazylan resminamalaryň, parfiýalylaryň gündelik durmuşynyň, olaryň ellinist sungatynyň baý subutnamalarynyň üstüni açandygy hakyndaky maglumatlary aýdanda, asyrlar geçse-de, öz ähmiýetini ýitirmeýän bu gadymy goraghana barada talyplarda uly gyzyklanma döretdi. Bu gezelenç örän täsirli we ýatdan çykmajak pursatlara baý boldy.
Çynar AZADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby