MAŞGALA TERBIÝESINDE ZENANLARYŇ ORNY
2024-nji ýylyň 27-nji fewralynda Türkmenistanyň Daşary işler ministrliginiň Halkara gatnaşyklary institutynyň ilkinji Zenanlar guramasynyň guramagynda institutyň talyp gyzlaryny watansöýüjilik ruhunda terbiýelemek, milli mirasymyza hormat goýmak, zähmete söýgi döretmek, maşgala mukaddesligi, tertip-düzgün, milli ahlak ýörelgelerini ýaýbaňlandyrmak, adam saglygyna zeper ýetirýän zyýanly endikleri düşündirmek, ýaşlaryň saglygyny, işjeňligini ýollaryny, maşgalanyň sagdyn bolmagy, arassaçylyk kadalaryny berjaý etmeklik we ýaşlaryň bu meseleler barada düşünjesini ýokarlandyrmak maksady bilen «Maşgala terbiýesinde zenanlaryň orny» atly wagyz-nesihat duşuşygy geçirildi. Duşuşygyň dowamynda Türkmenistanyň Daşary işler ministrliginiň Halkara gatnaşyklary institutynyň mugallymy, institutyň ilkinji Zenanlar guramasynyň başlygy Gyzylgül Gurbanmuhamedowa, Türkmenistanyň Içeri işler ministrliginiň Aşgabat şäheriniň Polisiýa müdirliginiň Berkararlyk etrap polisiýa bölüminiň wekili polisiýanyň kapitany Oguljan Gurbangulyýewanyň, Türkmenistanyň Saglygy goraýyş we Derman senagaty ministrliginiň Aşgabat şäher 7-nji saglyk öýüniň maşgala lukmany Aýsona Allaberenowanyň, Aşgabat şäheriniň ýaşaýjysy, mährem ene Kümüş Ataýewanyň çykyşlary diňlenildi. Ata-babalarymyz «Enesini gör-de gyzyny al, gyrasyny gör-de bizini al» diýip, ýöne ýere aýtmaýarlar. Edepli maşgaladan edepli gyz çykar. Sebäbi ene terbiýesi ene mekdebi gyz üçin görüm-görelde bolup çykyş edýär. Türkmen gelin-gyzlarymyzyň özüne serenjam berşi hemişe milli äheňdedir. Gyz maşgalanyň gözelligi onuň daş keşbinde jemlenýär. Asyrlarboýy sünnälenip gelnen däp – dessurlarda, ýagşy niýet, Watana söýgi, mirasyňa we milli däp – dessurlaryňa hormat, şol halkyň medeniýetiniň, sowatlylygynyň derejesini, alamatlaryny görkezýär. Gahryman Arkadagymyzyň «Enä tagzym – mukaddeslige tagzym» atly kitabynda: «Dünýä eneleriň mähribanlygyndan nurlanýar» diýip belleýär. Haçan-da ene mähri ýeterlik derejede bolanda çaganyň özüne bolan ynamy döräp, onuň kämil şahsyýet bolup ýetişmeginde ähmiýeti örän uludyr. Çaganyň edebi barada aýtsak, «Gyz edebi öýüň görki» ýa-da «Ata dünýäsi ogla gönezlik», «Çagany – ýaşdan, edebi başdan» nakyllarynda aýdylyşy ýaly, ene-ata terbiýäniň gözbaşy, perzentleriň penakäri bolup, her öýde ene-atanyň sözi durmuş ýörelgesi bolup durýar. Çaganyň terbiýesi ilki bilen öz maşgalasynda gören görüm-göreldesinden başlanýar, «Ata gören ýol keser, ene gören don keser» nakyldan ugur alyp agzybir ojakda halal zähmet çekilýän maşgalada terbiýe çaganyň öz ene-atasyna, ata Watanyna wepaly bolup ýetişmegine uly ähmiýet berýär.
Çykyş edenler hem, öz gezeginde ýurdumyzda ösüp gelýän ýaş nesliň zyýanly endiklerden daşda durmalydygy, saglygyň maşgaladan başlanýandygy, maşgala saglygynyň ýurduň saglygyna deňelýändigi, sagdyn jemgyýeti kemala getirmegiň zerurlygy dogrusynda gürrüň etdiler. Hormatly Prezidentimiz ýurdumyzda ýaş nesilleriň ylymly-bilimli, hünärlere höwesli we ýokary medeniýetli kemala gelmekleri ugrunda ägirt uly tagallalar edýär. Türkmen eneleriniň, zenanlarynyň maşgala bagtyna guwanyp ýaşamaklary üçin giň mümkinçilikleri döredip berýän Gahryman Arkadagymyzyň, hormatly Prezidentimiziň ömürleri uzak, belent başlary aman bolsun, tutýan tutumly işleri elmydama rowaçlyklara beslensin!
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň mugallymy.