Kitap okamak bäsleşigi boýunça test synagy geçirildi
2023-nji ýylyň 10-njy iýulynda Türkmenistanyň Daşary işler ministrliginiň Halkara gatnaşyklary institutynda Žurnalistikanyň nazaryýeti we amalyýeti kafedrasynyň «Ýaş žurnalistler» ylmy-döredijilik gurnagynyň işjeň agzalarynyň guramagynda kitap okamak boýunça «Kitap okan gullar, magnydan dokdur» atly bäsleşiginiň jemleri jemlendi. «Arkadag Serdarly bagtyýar ýaşlar» ýylynyň 7-nji iýulynda test arkaly geçirilen bu bäsleşige ýokary okuw mekdebimiziň ähli fakultetlerinden isleg bildiren talyplar gatnaşdylar. Bäsleşigiň dowamynda gatnaşyjylar Magtymguly Pyragynyň saýlanyp alnan 15 sany goşgusy, halypa ýazyjy, publisist Gurbannazar Orazgulyýewiň «Heňňam hekaýatlary» atly ýygyndysy hem-de Atajan Taganyň «Keseki» romany boýunça test soraglaryny çözdüler. Bäsleşigiň netijeleri boýunça 1-nji orna Halkara žurnalistikasy fakultetiniň II ýyl talyby Gurbanmyrat Aşyrow, 2-nji orna şol fakultetiň II ýyl talyby Ajaýyp Nobatowa, 3-nji orna bolsa şol fakultetiň I ýyl talyby Aýşirin Döwletowa mynasyp boldular.
Ozal habar berlişi ýaly, «Kitap okan gullar, magnydan dokdur» atly kitap okamak bäsleşiginde ýeňiji bolan talyp «Gujurly nesil» bilim merkezinde daşary ýurt dilleri boýunça okuwlaryň bir tapgyryny (üç aý) tölegsiz okamaga hukuk gazandy hem-de Türkmenistanyň Daşary işler ministrliginiň Halkara gatnaşyklary institutynyň Hormat haty bilen sylaglandy. Baýrakly orunlary eýelänler bolsa «Gujurly nesil» bilim merkeziniň dürli görnüşli arzanladyşlaryna we ýokary okuw mekdebimiziň Hormat hatlaryna mynasyp boldular.
Babahan EÝEBERENOW,
Türkmenistanyň Daşary işler ministrliginiň
Halkara gatnaşyklary institutynyň
Halkara
žurnalistikasy fakultetiniň II ýyl talyby.