Hytaý dilinde geçirilen onlaýn okuw-usuly maslahaty
Döwletmämmet Azady adyndaky Türkmen milli dünýä dilleri instituty Türkmenistanda daşary ýurt dillerini okatmagy kämilleşdirmegiň Konsepsiýasynda öňde goýlan möhüm wezipelerinden ugur alyp, Medeniýet we sungat işgärleriniň hem-de Magtymguly Pyragynyň şygryýet güni mynasybetli ýokary okuw mekdepleriniň daşary ýurt dillerini okadýan mugallymlaryň arasynda “Dünýäniň medeniýetleri we sungatlary diller arkaly dostlaşýar we bitewüleşýär” atly onlaýn okuw-usuly hepdeligini geçirýär. Şol hepdeligiň çäginde geçirilen maslahatlara Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň mugallymlary hem işjeň gatnaşýar.
2022-nji ýylyň 17-nji iýunynda geçirilen hytaý dili mugallymlaryň onlaýn okuw-usuly maslahatynda Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň hytaý dili mugallymy M.Gelenowa hytaý dilini okatmagyň usullary we aýratynlyklary barada hytaý dilinde çykyş etdi. Maslahata gatnaşyjylar hytaý diliniň iýerogliflerini okatmagyň usullary we öňdebaryjy tejribeleri barada giňişleýin pikir alyşdylar.
Biziň günlerimizde ene dili bilen bir hatarda, daşary ýurt dillerini bilmegiň özi maglumat tehnologiýalaryndan erkin peýdalanmaga, şahsyýetiň intellektual derejesiniň ýokarlanmagyna ýardam edýär. Şundan ugur alnyp, bilim ulgamynyň ähli basgançaklarynda daşary ýurt dilleriniň okadylyşyny kämilleşdirmek üçin zerur şertler döredilýär.
Güljahan GARLIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.