Hukukçy talyplarymyz üstünlik gazandylar
2023-nji ýylyň 22-nji dekabrynda “Hukukçy” hojalyk jemgyýetiniň yglan eden raýat hem-de jenaýat işleri boýunça “Mysaly okuw” bäsleşiginiň jemleýji tapgyry we ýaryşyň jemi paýtagtymyzyň “Grand” myhmanhanasynda jemlendi. Bu bäsleşige Türkmenistanyň Daşary işler ministrliginiň Halkara gatnaşyklary institutynyň, Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň hukuk hünärinde okaýan talyplaryndan hem-de Türkmenistanyň Prezidentiniň ýanyndaky Döwlet gullugy Akademiýasynyň diňleýjilerinden düzülen toparlar gatnaşdylar.Okuw-tejribe görnüşinde meýilleşdirilen bäsleşige jemi 36 topar hasaba alnyp, olardan 16-sy raýat işi boýunça, jenaýat işi boýunça bolsa 2 topar bäsleşigiň birinji tapgyryndan geçmegi başardylar.
Bäsleşik talyplaryň ýokary okuw mekdebinde alýan nazary bilimlerini tejribe bilen utgaşdyrmak, olaryň geljekki hünär işi üçin zerur bolan durmuş başarnyklaryny, hukuk endiklerini has-da kämilleşdirmek, ýurdumyzda hukuk aňyýetiniň, biliminiň hem-de medeniýetiniň ösüşine goşant goşmak maksady bilen geçirilip, onda talyplara tejribeden alnan bir jedelli ýagdaýy Türkmenistanyň kanunçylygyna esaslanyp seljermek we ony mysaly kazyýet önümçiligini gurnamak görnüşinde alnyp baryldy. Institutymyzdan hem bu bäsleşige hukuk hünärinde okaýan talyplardan düzülen toparlar gatnaşyp, “Jenaýat işi boýunça finalist topar” — 3-nji ýyl talyplarymyz Leýli Arapowa we Altyn Babyşowa, “Bäsleşigiň iň gowy dilewary” diýen ugry boýunça 2-nji ýyl talybymyz Intizar Taganyýazowa ýeňiji bolmagy başardylar. Ýeňiji toparlara şeýle hem, beýleki gatnaşan toparlara höweslendiriji sowgatlar gowşuryldy. Umuman, netijeli geçen bäsleşigiň ahyrynda talyplar şu bäsleşigi gurnan “Hukukçy” hojalyk jemgyýetine we onuň guramaçylyk toparyna özleriniň minnetdarlygyny bildirdiler.
Mäneguly ÖWEZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara
hukugy fakultetiniň 1-nji ýyl talyby.