Halypa-şägirtlik ýörelgesine bagyşlanan döredijilik duşuşygy
2021-nji ýylyň 17-nji noýabrynda Türkmenistanyň Daşary işler ministrliginiň Halkara gatnaşyklary institutynda Žurnalistikanyň nazaryýeti we amalyýeti kafedrasynyň gurnamagynda S.Türkmenbaşy adyndaky Baş drama teatrynyň sahna ussady, “Miras” radioýaýlymynyň alypbaryjysy Batyr Çaryýew bilen döredijik duşuşygy geçirildi. Türkmenistanyň Prezidentiniň 2021-nji ýylyň 9-njy fewralynda sanly wideoaragatnaşyk arkaly geçiren iş maslahatynda köpçülikleýin habar beriş serişdeleriniň işini kämilleşdirmek, ýokary derejeli žurnalistleri taýýarlamaga aýratyn üns bermek, halypa-şägirtlik ýörelgesini dowam etdirmek barada beren tabşyryklaryna esaslanyp guralan duşuşyga Halkara žurnalistikasy fakultetiniň mugallymlarydyr talyplary gatnaşdylar.
Döredijilik duşuşygynyň dowamynda myhman talyp ýaşlara sahna ussatlygynyň we radiogepleşiklerini alyp barmagyň inçe tilsimleri barada täsirli gürrüňleri berdi. Şeýle-de ol tele we radiogepleşikleriň ýokary hil derejesini üpjün etmek, olary däp-dessurlarymyzy, milli aýratynlyklarymyzy nazara almak arkaly taýýarlamak, halkymyzyň şöhratly taryhyny, medeni mirasyny giňden wagyz etmek dogrusynda degerli maslahatlaryny berdi.
Ýaş žurnalistler myhmana özlerini gyzyklandyrýan sowallaryny berip, žurnalistika hünäri bilen baglanyşykly özara pikir alyşdylar.
Gyzlargül ANNAGURDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.