Halkara terjimeçilik gününe bagyşlanyp geçirilen okuw sapagy
2022-nji ýylyň 30-njy sentýabrynda Türkmenistanyň Daşary işler ministrliginiň Halkara gatnaşyklary institutynda Dünýä dilleri kafedrasynyň uly mugallymy Çemen Baýryýewanyň gurnamagynda institutyň Halkara gatnaşyklary fakultetiniň 3-nji ýyl talyplary bilen Halkara terjimeçilik gününe bagyşlanyp okuw sapagy geçirildi. Bilşimiz ýaly, her ýylyň 30-njy sentýabrynda bellenilip geçilýän bu baýramçylyk dilden we ýazuw arkaly terjime edýän terjimeçileriň hünär baýramçylygydyr. 1991-nji ýylda Terjimeçileriň halkara federasiýasy (FIT) 30-njy sentýabry Halkara terjimeçileriň güni diýip yglan etdi. Şeýle hem, 2017-nji ýylda Birleşen Milletler Guramasynyň Baş Assambleýasynyň 71-nji sessiýasynda Halkara terjimeçiler güni barada Kararnama guramanyň agza döwletleri tarapyndan biragyzdan kabul edildi. Bu Kararnamada dünýäde parahatçylygy üpjün etmekde, halklaryň arasynda özara düşünişmekligi ýola goýmakda, terjimäniň ähmiýetiniň uludygy aýratyn bellenilip geçilýär.
Sapagyň dowamynda talyplar bu aýratyn günüň ähmiýeti, terjimäniň görnüşleri, şeýle hem aýratynlyklary bilen ýakyndan tanyş boldular. Mundan başga-da, mugallymyň tabşyrygy esasynda dürli ýumuşlaryň kömegi bilen terjimäniň nazaryýetini we amalyýetini öwrendiler hem-de dürli dillerde (Türkmen- Iňlis, Iňlis- Rus) ýumuşlary terjime edip, diliň grammatiki, leksiki, stilistiki kadalaryna eýerip, dil serişdelerini dogry ulanmagy başarmalydyklaryna göz ýetirdiler.
Sapagyň ahyrynda talyplar terjimeçilik babatda özlerini gyzyklandyrýan soraglary ara alyp maslahatlaşdylar we halypa mugallyma beren gyzykly maglumatlary üçin sagbolsun aýtdylar.
Akgözel RASULOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.