TÜRKMENISTANYŇ DIPLOMATIK IŞGÄRLERINIŇ GÜNI MYNASYBETLI MASLAHAT WE BAÝRAMÇYLYK KONSERTI GEÇIRILDI
2026-njy ýylyň 20-nji fewralynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatik işgärleriniň güni mynasybetli “Garaşsyz, baky Bitarap Türkmenistan ̶ bedew batly at myradyň mekany” ýylynda Türkmenistanyň daşary syýasatynyň ileri tutulýan ugurlary” atly maslahaty geçirildi. Maslahata Ministrler Kabinetiniň Başlygynyň orunbasary, Daşary işler ministri Raşid Meredow, şeýle hem daşary döwletleriň we halkara guramalaryň ýurdumyzdaky diplomatik wekilhanalarynyň, ýurdumyzyň daşary ýurtlardaky diplomatik wekilhanalarynyň, konsullyk edaralarynyň we halkara guramalarynyň ýanyndaky hemişelik wekilhanalarynyň ýolbaşçylary, daşary syýasat edarasynyň işgärleri, halypa diplomatlar, professor-mugallymlar, talyp ýaşlar gatnaşdylar.
Maslahatyň öňüsyrasynda Türkmenistanda akkreditirlenen daşary ýurtlaryň diplomatik wekilhanalary we halkara guramalary tarapyndan guralan hem-de halkymyzyň parahatçylyk söýüjilik, hoşniýetlilik ýörelgelerini, hemişelik Bitaraplygymyzyň ähmiýetini wagyz edýän amaly-haşam sungatynyň gymmatlyklary şekillendirilen sergi ýaýbaňlandyryldy. Soňra baýramçylyk maslahaty öz işine başlady. Maslahatyň başynda Türkmenistanyň Prezidenti Serdar Berdimuhamedowyň diplomatik işgärleriniň hünär baýramy mynasybetli iberen Gutlagy diňlenildi. Onda baky Bitarap döwletimiziň parahatçylyk hem-de ynanyşmak ýörelgelerine esaslanýan daşary syýasatynyň we diplomatiýasynyň uzakmöhletleýin milli maksatnamalarymyzy amala aşyrmak üçin halkara giňişliginde zerur bolan ähmiýetli mümkinçilikleriň döredilmegine gönükdirilendigi bellenilýär.
Maslahatda Türkmenistanyň Ministrler Kabinetiniň Başlygynyň Orunbasary, Daşary işler ministri Raşid Meredowyň, BMG-niň Baş sekretarynyň Ýörite wekili, BMG-niň Merkezi Aziýa üçin Öňüni alyş diplomatiýasy boýunça sebit merkeziniň başlygy Kaha Imnadzeniň, Birleşen Milletler Guramasynyň Türkmenistandaky Hemişelik Utgaşdyryjysy Dmitriý Şlapaçenkonyň, Ermenistan Respublikasynyň Türkmenistandaky Adatdan daşary we Doly ygtyýarly Ilçisi Arsen Awagýanyň, Beýik Britaniýanyň we Demirgazyk Irlandiýanyň Birleşen Patyşalygynyň Türkmenistandaky Adatdan daşary we Doly ygtyýarly Ilçisi Stiwen Konlonyň, Ýewropanyň Täzeleniş we Ösüş Bankynyň Türkmenistandaky wekilhanasynyň ýolbaşçysy Erik Liwniniň çykyşlary diňlenildi. Maslahaty alyp bardy Türkmenistanyň Daşary işler ministrliginiň Halkara gatnaşyklary institutynyň rektory Gülşat Ýusupowa alyp bardy.
Maslahatyň barşynda bellenilişi ýaly, hormatly Prezidentimiz Serdar Berdimuhamedowyň baştutanlygynda ýurdumyz köpugurly halkara hyzmatdaşlygy ösdürmäge, sebit hem-de ählumumy möçberde Durnukly ösüş maksatlaryna ýetmek işinde dünýä bileleşiginiň tagallalaryny birleşdirmäge gönükdirilen netijeli daşary syýasy ugry yzygiderli durmuşa geçirýär. Maslahatda çykyş edenler türkmen diplomatiýasynyň sebit hem-de halkara derejesinde dostluk, özara düşünişmek we ynanyşmak gatnaşyklarynyň pugtalandyrylmagyna ähmiýetli goşant goşýandygyny nygtadylar. Bu ugurda durmuş, ykdysady, ekologiýa we häzirki döwrüň beýleki derwaýys meseleleriniň oňyn çözgüdine gönükdirilen halkara başlangyçlary bilen çykyş edýän Türkmenistanyň Prezidenti Serdar Berdimuhamedowyň parasatly baştutanlygynyň derwaýys orny bellenilip geçildi.
Maslahatyň ahyrynda oňa gatnaşyjylar hormatly Prezidentimiz Serdar Berdimuhamedowyň adyna Ýüzlenme kabul edip, ýurdumyzyň diplomatik gullugynyň işini kämilleşdirmek meselelerine aýratyn üns berilýändigi üçin tüýs ýürekden hoşallyk bildirdiler hem-de mundan beýlägem öňde goýlan wezipeleri üstünlikli çözmekde ähli tagallalaryny gaýgyrmajakdyklaryna ynandyrdylar. Asylly däbe görä, hünär baýramynyň şanyna Türkmenistanyň daşary syýasat strategiýasynyň durmuşa geçirilmegine işjeň gatnaşýandyklary üçin diplomatik gullugyň ýaş işgärlerine we Türkmenistanyň Daşary işler ministrliginiň Halkara gatnaşyklary institutynyň şu ýyl okuwy tamamlaýan tapawutlanan talyplaryna Daşary işler ministrliginiň diplomlaryny gowşurmak dabarasy boldy.
Soňra bolsa Türkmenistanyň Daşary işler ministrliginiň Halkara gatnaşyklary institutynyň we Maýa Kulyýewa adyndaky Türkmen milli konserwatoriýasynyň çeper-höwesjeňler toparynyň talyplarynyň ýerine ýetirmeginde Türkmenistanyň diplomatik işgärleriniň gününe bagyşlanan baýramçylyk konserti geçirildi. Talyplaryň dürli dillerde ýerine ýetirmeginde ýaňlanan aýdym-sazly çykyşlary esasy dabaralar bilen utgaşdy. Myhmanlara ýakymly duýgulary bagyşlan bu baýramçylyk konserti Türkmenistanyň diplomatik işgärleriniň hünär baýramynyň özboluşly jemlenmesine öwrüldi.
Maslahat we baýramçylyk konserti tamamlananyndan soňra myhmanlar üçin agzaçar sadakasy berildi.
Suraý ÖWLIÝAGULYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary we diplomatiýa kafedrasynyň mugallymy.
Bu barada şu ýerde hem okap bilersiňiz: