“BITARAPLYK – TÜRKMENISTANYŇ DÖWLET SYÝASATYNYŇ BINÝATLAÝYN ESASYDYR” ATLY AÝDYM-SAZLY BAÝRAMÇYLYK MASLAHATY GEÇIRILDI
2026-njy ýylyň 16-njy fewralynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatik işgärleriniň güni mynasybetli Türkmenistanyň Kärdeşler arkalaşyklarynyň Milli merkezi bilen bilelikde “Bitaraplyk – Türkmenistanyň döwlet syýasatynyň binýatlaýyn esasydyr” atly aýdym-sazly baýramçylyk maslahaty geçirildi. Maslahata Türkmenistanyň Kärdeşler arkalaşyklarynyň Milli merkeziniň hem-de Türkmenistanyň Daşary işler ministrliginiň wekilleri, halypa diplomatlar, institutyň professor-mugallymlary we talyp ýaşlar gatnaşdylar.
Maslahatda Türkmenistanyň Daşary işler ministrliginiň Halkara gatnaşyklary institutynyň rektory G.Ýusupowa, ÝUNESKO-nyň işleri boýunça Türkmenistanyň milli toparynyň jogapkär sekretary, Türkmenistanyň Gahrymany, Adatdan daşary we Doly ygtyýarly Ilçi Ç.Rustemowa, Türkmenistanyň Kärdeşler arkalaşyklarynyň Milli merkeziniň başlygynyň orunbasary K.Amandurdyýew, Türkmenistanyň Döwlet, hukuk we demokratiýa institutynyň direktory, hukuk ylymlarynyň doktory Ý.Nuryýew hem-de Türkmenistanyň Daşary işler ministrliginiň Halkara gatnaşyklary institutynyň Strategik barlaglar boýunça ylmy merkeziniň başlygy, Adatdan daşary we Doly ygtyýarly Ilçi Ş.Şiriýew dagylar çykyş etdiler.
Maslahatda çykyş edenler türkmen diplomatiýasynyň sebit we halkara derejesinde dostluk, özara düşünişmek we ynanyşmak gatnaşyklarynyň pugtalandyrylmagyna ähmiýetli goşant goşýandygyny nygtadylar. Bu ugurda durmuş, ykdysady, ekologiýa we häzirki döwrüň beýleki derwaýys meseleleriniň oňyn çözgüdine gönükdirilen halkara başlangyçlary bilen çykyş edýän Gahryman Arkadagymyzyň, Arkadagly Gahryman Serdarymyzyň oýlanyşykly baştutanlygynyň derwaýys orny bellenilip geçildi.
Maslahatyň çäklerinde türkmen diplomatiýasyna mynasyp goşant goşan halypa diplomatlara we professor-mugallymlara Türkmenistanyň Kärdeşler arkalaşyklarynyň Milli merkeziniň gymmat bahaly sowgatlary dabaraly ýagdaýda gowşuryldy. Şeýle hem maslahatyň ahyrynda Türkmenistanyň Daşary işler ministrliginiň Halkara gatnaşyklary institutynyň gurnamagynda ýurdumyzyň ýokary okuw mekdepleriniň arasynda geçirilen “Bedew batly döwrüň bagtly ýaşlary” atly döredijilik bäsleşiginiň, şeýle-de Döwlet ders bäsleşikleriniň ýeňijilerine sowgatlary gowşurmak dabarasy hem utgaşykly geçirildi.
Maslahata gatnaşyjylar ýurdumyzda diplomatik ulgamyny ösdürmekde yzgiderli döredilip berilýän mümkinçilikler üçin Gahryman Arkadagymyza, Arkadagly Gahryman Serdarymyza alkyş sözlerini aýtdylar.
Enejan ORAZMYRADOWA,
Türkmenistanyň Daşary işler ministrliginiň
Halkara gatnaşyklary institutynyň mugallymy.
Bu barada şu ýerde hem okap bilersiňiz: