Halkara maslahaty geçirildi
2021-nji ýylyň 26-njy iýunynda Türkmenistanyň Magtymguly adyndaky Türkmen döwlet uniwersitetinde “Magtymguly Pyragy we türkmen halkynyň garaşsyz döwletlilik taglymaty”atly halkara maslahaty geçirildi. Oňa daşary ýurtlaryň ylmy jemgyýetleriniň wekilleriniň 30-dan gowragy onlaýn görnüşde, şeýle hem ýurdumyzyň ylmy jemgyýetçiligiň wekilleri, ýokary okuw mekdepleriniň professor- mugallymlary , talyplary hem-de köpçülikleýin habar beriş serişdeleriniň wekilleri gatnaşdylar. Maslahatda çykyş edenler Magtymguly Pyragynyň şygyrlarynyň adamzadyň milli mirasyna uly goşant bolup durýandygyny nygtap bellediler.
Halkara maslahaty esasy mejlisden soňra öz işini dört bölümçede dowam etdi. Maslahatyň üçünji bölümçesi “ Magtymguly Pyragy we ylym-bilimiň jemgyýetdäki orny” ady bilen Türkmenistanyň Daşary işler ministrliginiň Halkara gatnaşyklary institutynda geçirildi. Bu ýokary okuw mekdebiniň rektory Jumamyrat Gurbangeldiýewiň alyp barmagynda geçirilen maslahatda çykyş edenler Magtymguly Pyragynyň müňýyllyklardan bäri hoşniýetliligi, parahatçylyk söýüjiligi, açyklygy, kalbynyň giňligi we jomartlygy bilen tapawutlanýan türkmen halkynyň synmaz edebi sütünleriniň biridigini belläp geçdiler. Maslahatda edilen çykyşlar oňa gatnaşyjylarda uly täsir galdyrdy.
Aýmaral IŞANGULYÝEWA,
Türkmenistanyň Daşary işler ministrliginiň
Halkara gatnaşyklar institutynyň
Halkara žurnalistikasy fakultetiniň III ýyl talyby.