Halkara epidemiýa garşy taýýarlyk güni: ählumumy howpsuzlygyň kepili
27-nji dekabr — dünýä jemgyýetçiligi tarapyndan Halkara epidemiýa garşy taýýarlyk güni hökmünde bellenilip geçilýär. Bu senäniň döredilmegi, Birleşen Milletler Guramasynyň Baş Assambleýasy tarapyndan 2020-nji ýylda, tutuş dünýäni sarsdyran COVID-19 pandemiýasynyň sapaklary esasynda kabul edildi.
Bu günüň esasy maksady geljekde ýüze çykyp biljek epidemiýalaryň we pandemiýalaryň öňüni almak, olara garşy netijeli çäreleri görmäge taýýar bolmakdyr. Saglygy saklaýyş ulgamynyň durnuklylygyny ýokarlandyrmak we halkara hyzmatdaşlygy berkitmek bu günüň ündew edýän esasy ýörelgeleridir.
Türkmenistan döwletimiz saglygy goraýyş ulgamyny döwrebaplaşdyrmaga we epidemik howpsuzlygy üpjün etmäge uly üns berýär. Ýurdumyzda keselleriň öňüni almak üçin ýokary hilli anyklaýyş merkezleri we döwrebap hassahanalar hereket edýär. Milli «Saglyk» maksatnamasynyň çäginde lukmançylyk yzygiderli kämilleşdirilýär. Şeýle hem, Türkmenistan halkara derejesinde «Ylmy diplomatiýany» öňe sürýär we Bütindünýä Saglygy Saklaýyş Guramasy (BSSG) bilen ysnyşykly hyzmatdaşlyk alyp barýar.
Halkara epidemiýa garşy taýýarlyk güni her bir ynsanyň öz saglygyna we daş-töweregine jogapkärçilikli çemeleşmelidigini ýatladýan gün bolup durýar. Biz geçmişdäki kynçylyklardan sapak alyp, geljege has ynamly we taýýarlykly gadam basmalydyrys. Çünki saglyk iň gymmatly baýlykdyr.
Ogulnur GELDIMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.