HALKARA ENE DILINIŇ GÜNI
Her ýylyň 21-nji fewralynda «Halkara ene diliniň güni» dünýäde giňden bellenilýär. Bu sene öz gözbaşyny 1999-njy ýylyň 17-nji noýabrynda geçirilen ÝUNESKO-nyň Baş konferensiýasynda «Halkara ene diliniň güni» (International Mother Language Day) bellemek baradaky karardan alyp gaýdýar. 2000-nji ýyldan bäri bu sene Ýer ýüzünde her ýyl dürli şygarlar astynda bellenilýär. Häzirki wagtda dünýäde 6 müň töweregi dil bolup, bilim we jemgyýetçilik ulgamynda diňe müňden gowrak dil möhüm orny eýeleýär. Sanly tehnologiýalar ulgamynda bolsa, bary-ýogy ýüze golaý dil ulanylýar.
Öz köküni Oguz han türkmenden alyp gaýdýan türkmen dilimiz türki dilleriň arasynda iň baý dilleriň biridir. Türkmenistan döwletimiziň döwlet dili bolan türkmen dili hakynda 1990-njy ýylyň 24-nji maýynda «Döwlet dili hakyndaky» Türkmenistanyň Kanuny, 1993-nji ýylyň 12-nji aprelinde täze türkmen elipbiýine geçmek hakynda Perman kabul edildi. 1996-njy ýylyň 1-nji ýanwarynda türkmen milli elipbiýi ulanylyşa girizildi.
Häzirki wagtda türkmen dili nesilden nesle geçip, milletiň durmuşyny, taryhyny we medeniýetini beýan edýär.
Maksat GARÝAGDYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
Syýasy kommunikasiýa we internet žurnalistikasy hünäriniň I ýyl talyby.