HALKARA ARAP DILI GÜNI
BMG-de 2010-njy ýyldan bäri Halkara arap dili güni bellenip geçilýär. Ene diliniň Halkara gününiň öňüsyrasynda BMG-niň Jemgyýetçilik gatnaşyklary bölümi guramanyň alty resmi diliniň her biri üçin öz baýramyny bellemegi teklip etdi. Bu teklibiň medeniýetara gepleşikleri we köp dilli dünýäni ösdürmäge hyzmat etjekdigi çak edilýär.
Halkara arap diliniň güni üçin halkara senenamasynda 18-nji dekabr saýlanylyp alyndy. 1973-nji ýylda bu güni BMG-niň Baş Assambleýasy arap dilini Birleşen Milletler Guramasynyň resmi we iş dilleriniň biri hökmünde öz içine kabul etdi.
Häzirki wagtda arap dilinde gürleýänleriň we onuň görnüşleriniň sany takmynan, 400 milliona barabardyr. Asyrlar boýy arap dili çekimli sesleriň aýdylyşy bilen baglanyşykly yzygiderli üýtgäp gelýär.
Arap dili BMG-niň Baş Assambleýasynyň we BMG-niň käbir beýleki guramalarynyň resmi we iş dilleriniň biridir. Ähli arap ýurtlarynyň resmi dili, şeýle hem Ysraýylyň, Eritreýanyň, Çadyň, Somaliniň we Jibutiniň resmi dilleriniň biri arap dilidir.
Hormatly Prezidentimiz: «Berkarar döwletimiziň bagtyýarlyk döwründe biziň öňde goýýan esasy wezipämiz bilimiň hilini has-da ýokarlandyrmakdan ybaratdyr» diýip bellemek bilen dünýä dillerini kämil öwrenmegi milli ylym-bilim ulgamyny ösdürmegiň esasy şertleriniň biri hökmünde öňe sürýär.
Dil öwrenmek, ýatkeşligiňi ösdürýär. Ol jemgyýetçilik gatnaşyklaryny gowulaşdyrmaga hem-de aň-bilim ukyplaryny ösdürmäge ýardam berýär.
Humaý MEREDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
I ýyl talyby.